بنوں میں عسکریت پسندوں کی فائرنگ سے پولیس اہلکار ہلاک

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں عسکریت پسندوں کی فائرنگ کے نتیجے میں ایک پولیس اہلکار، جو امن کمیٹی کا رکن بھی تھا، ہلاک ہو گیا۔ پولیس کا کہنا ہے کہ واقعے میں متعدد عسکریت پسند ہلاک و زخمی ہوئے ہیں۔

پولیس کے مطابق تھانہ ٹاؤن کے علاقے میں مین پشاور-بنوں روڈ پر عسکریت پسندوں کے ناکے پر امن کمیٹی کے اراکین کے ساتھ شدید فائرنگ کا تبادلہ ہوا۔ اس تبادلے میں بیزن خیل امن کمیٹی کا رکن اور پولیس اہلکار ہلاک ہو گئے۔

پولیس کی بھاری نفری بکتر بند گاڑیوں کے ہمراہ موقع پر پہنچنے پر عسکریت پسند فرار ہو گئے۔ پولیس نے بتایا کہ واقعے کے بعد علاقے میں سرچ آپریشن جاری ہے اور متعدد عسکریت پسند ہلاک و زخمی ہونے کی اطلاعات ہیں۔