بنوں میں عمائدین کی کوششوں سے 7 مغوی پولیس اہلکار بازیاب

بنوں (ڈیلی اردو) صوبہ خیبرپختونخوا کے ضلع بنوں میں گزشتہ روز اغوا ہونے والے 7 پولیس اہلکاروں کو بحفاظت بازیاب کرلیا گیا۔ گزشتہ روز اہلکاروں کی بازیابی کے لیے مقامی سطح پر جرگہ تشکیل دیا گیا تھا۔

گزشتہ روز بنوں کے دور افتادہ پہاڑی علاقے احمد زئی سب ڈویژن میں نامعلوم افراد نے روچہ چیک پوسٹ سے پولیس اہلکاروں کو اغوا کیا تھا۔

بنوں کے ڈسٹرکٹ پولیس آفیسر (ڈی پی او) ضیاالدین احمد نے ڈان کو بتایا کہ تمام 7 پولیس اہکار بحفاظت واپسی آگئے ہیں۔

ڈی پی او ضیاالدین احمد کا مزید کہنا تھا کہ مقامی عمائدین کے ذریعے دباؤ بڑھانے اور پولیس کے سرچ آپریشن کی وجہ سے اہلکاروں کی بحفاظت بازیابی میں مدد ملی۔

گزشتہ روز حملے کے دوران عسکریت پسندوں نے چیک پوسٹ پر دھاوا بولا تھا اور پولیس اہلکاروں کو اغوا کرلیا تھا۔

پولیس عہدیدار کے مطابق مسلح افراد نے پولیس اہلکاروں سے اسلحہ بھی چھین لیا تھا۔

واقعہ کے بعد پولیس کی بھاری نفری علاقے میں پہنچ گئی تھی اور انہوں نے دور افتادہ اور پہاڑی علاقے میں اہلکاروں کی بازیابی کے لیے سرچ آپریشن شروع کیا تھا۔

مقامی افراد کا دعویٰ ہے کہ چیک پوسٹ کا گھیراؤ کرنے والے مسلح افراد کی تعداد 30 سے 40 تھی۔

روچہ چیک پوسٹ شمالی وزیرستان اور جانی خیل کے سنگم پر پہاڑی علاقے میں واقع ہے۔