جنوبی وزیرستان: مسجد میں نماز کے دوران ڈرون حملہ، 4 افراد زخمی، شدید فائرنگ اور گولہ باری سے شہری محصور

جنوبی وزیرستان (ڈیلی اردو)خیبرپختونخواہ کے شورش زدہ قبائلی ضلع جنوبی وزیرستان میں کرچ خیل مسجد میں نماز کے دوران مبینہ دہشت گردوں کے کواڈ کاپٹر حملے کے نتیجے میں 4 افراد زخمی ہوگئے، جبکہ علاقے میں شدید فائرنگ اور مارٹر گولوں کی گولہ باری کے باعث شہریوں کو محفوظ مقامات تک پہنچنے میں مشکلات کا سامنا کرنا پڑا۔

مقامی ذرائع کے مطابق واقعہ پیر کی شام پیش آیا، جب مسجد میں نمازی عبادت میں مصروف تھے۔ حملے میں زخمی ہونے والوں کی شناخت ولی مت خان ولد مشال خان، صدام حسین ولد لال گل، سعید ولد میر عباس اور قاری حسین ولد میر عباس کے ناموں سے ہوئی ہے۔

رپورٹ کے مطابق کواڈ کاپٹر حملے کے ساتھ مارٹر گولوں کی فائرنگ اور شدید فائرنگ کا سلسلہ بھی جاری رہا، جس کے باعث علاقے میں خوف و ہراس پھیل گیا۔ مسلسل فائرنگ اور گولہ باری کی وجہ سے مقامی افراد زخمیوں کو محفوظ مقامات تک منتقل کرنے اور انہیں طبی امداد کے لیے پہنچانے میں مشکلات کا سامنا کرتے رہے، جبکہ متعدد شہری اپنی حفاظت کے پیش نظر گھروں میں محصور رہے۔

واقعے نے علاقے میں شہریوں کی سلامتی اور عبادت گاہوں کے تحفظ سے متعلق خدشات کو بڑھا دیا ہے۔ تاہم حملے کی ذمہ داری اور واقعے کے دیگر پہلوؤں کے بارے میں متعلقہ حکام کی جانب سے مزید تفصیلات سامنے آنا باقی ہیں۔