بنوں میں مسافر گاڑیوں کے قریب دو دھماکے، 7 افراد ہلاک، 6 زخمی

بنوں (ڈیلی اردو) پاکستان کے صوبہ خیبر پختونخوا کے ضلع بنوں کے قریب ڈومیل کے علاقے میں مسافر گاڑیوں کو نشانہ بناتے ہوئے وقفے وقفے سے دو دھماکے کیے گئے، جن کے نتیجے میں کم از کم 7 افراد ہلاک جبکہ 6 زخمی ہوگئے۔

ضلعی پولیس افسر (ڈی پی او) یاسر آفریدی نے مقامی صحافیوں کو بتایا کہ واقعہ تھانہ احمد زئی کی حدود میں پیش آیا، جہاں دھماکوں کے نتیجے میں سات افراد ہلاک اور متعدد زخمی ہوئے۔

مقامی امن کمیٹی کے رہنما نور دراز کے مطابق مقامی ڈرائیور اللہ نور اپنی گاڑی میں مسافروں کو لے کر جا رہا تھا۔ جب گاڑی مرکہ بیرہ کے مقام پر پہنچی تو اسے دھماکہ خیز مواد سے نشانہ بنایا گیا۔

انہوں نے بتایا کہ گاڑی میں ڈرائیور کے اہل خانہ کے علاوہ دیگر مسافر بھی سوار تھے، جو دھماکے کی زد میں آ گئے۔

پولیس کے مطابق پہلے دھماکے کے بعد زخمیوں کو منتقل کرنے کے لیے آنے والی دوسری گاڑی کو بھی کچھ فاصلے پر ریموٹ کنٹرول دھماکے سے نشانہ بنایا گیا، جس کے نتیجے میں مزید جانی نقصان ہوا۔

مقامی ذرائع نے ڈیلی اردو کو بتایا کہ علاقہ کچے اور پہاڑی راستوں پر مشتمل ہونے کے باعث امدادی کارروائیوں اور زخمیوں کی اسپتال منتقلی میں مشکلات پیش آئیں۔ بعد ازاں جاں بحق افراد کی لاشوں کو آر ایچ سی جبکہ زخمیوں کو کے جی این اسپتال منتقل کر دیا گیا۔

واقعے کے بعد سکیورٹی فورسز اور قانون نافذ کرنے والے ادارے جائے وقوعہ پر پہنچ گئے، علاقے کو گھیرے میں لے لیا گیا اور شواہد اکٹھے کرنے کے ساتھ حملے کی تحقیقات شروع کر دی گئی ہیں۔ تاحال کسی گروپ نے حملے کی ذمہ داری قبول نہیں کی۔