بنوں میں پولیس اہلکار اغوا کے بعد ہلاک، سرکاری اعزاز کے ساتھ نمازِ جنازہ

پشاور (ڈیلی اردو/بی بی سی) پاکستان کے شورش زدہ صوبے خیبرپختونخوا کے ضلع بنوں میں عسکریت پسندوں کے ہاتھوں اغوا کے بعد قتل ہونے والے پولیس اہلکار کی نماز جنازہ سرکاری سطح پر ادا کر دی گئی ہے۔

اغوا کے بعد قتل کا یہ واقعہ بنوں کی تحصیل ڈومیل کے علاقے عمل خیل میں پیش آیا ہے۔

ضلعی پولیس افسر یاسر آفریدی نے مقامی صحافی کو بتایا کہ سب ڈویژن وزیر بنوں میں کانسٹیبل نوید اکرم، عمل خیل ڈومیل کے رہائشی مقامی فٹبال گراؤنڈ سے مسلح افراد نے اغوا کر لیا تھا۔

ایسی اطلاعات ہیں کہ مغوی اہلکار کو اس سے قبل بھی دھمکیاں دی گئی تھیں کہ وہ پولیس کی نوکری چھوڑ دیں تاہم انھوں نے فرائض کی انجام دہی جاری رکھی تھی۔

اہل علاقہ کے مطابق عمائدین نے مغوی کی رہائی کے لیے مذاکرات بھی کیے تاہم وہ بات چیت ناکام ہوئی اور پولیس اہلکار نوید اکرم کو قتل کر دیا گیا جن کی لاش سدا خیل روڈ پر ملی ہے۔ سپاہی نوید اکرم کی نماز جنازہ آج صبح پولیس لائن بنوں میں سرکاری اعزاز کے ساتھ ادا کر دی گئی ہے۔

یاد رہے کہ صوبے کے جنوبی اضلاع میں آئے روز پولیس اور سکیورٹی فورسز کے علاوہ عام شہریوں پر حملوں کی اطلاعات موصول ہوتی رہتی ہیں۔

بنوں ضلع کی سرحد پر واقع لکی مروت کی تحصیل نورنگ میں چند روز پہلے نا معلوم افراد نے فائرنگ کرکے ٹریفک پولیس کے تین اہلکاروں کو فائرنگ کرکے ہلاک کر دیا تھا ان میں ٹریفک پولیس کے انچارج بھی شامل تھے۔

اسی طرح دو روز پہلے لکی مروت کے علاقے بیگو خیل میں لکی سیمنٹ فیکٹری کے ملازمین کو لے جانے والی بس کے قریب دھماکہ کیا گیا تھا جس میں ہسپتال حکام کے مطابق ایک شخص ہلاک اور 11 زخمی ہو گئے تھے۔

بنوں ضلع میں چند ماہ کے دوران پولیس اہلکاروں کے اغوا اور ان کے قتل کی واقعات اس سے پہلے بھی پیش آ چکے ہیں جوکہ مقامی دیہاتوں میں مقامی امن کمیٹی کے عہدیداروں کے ساتھ عسکریت پسندوں کی جھڑپوں کی اطلاعات بھی آئے روز موصول ہوتی رہتی ہیں۔

بنوں ریجن کے پولیس سربراہ ڈی آئی جی بنوں کی جانب سے سال 2025 میں پولیس کی کارکردگی کی رپورٹ چند روز پہلے جاری کی گئی ہے جس میں کہا گیا ہے کہ ایک ماہ میں272 عسکریت پسندوں کو ہلاک 163 کو زخمی اور 187 کو گرفتار کیا گیا ہے۔

اس رپورٹ میں یہ نہیں بتایا گیا کہ اس سال کے دوران پولیس پر کتنے حملے ہوئے ہیں اور اس میں کتنا جانی نقصان ہوا ہے ۔