بنوں میں ڈرون حملہ، دو افراد ہلاک، تین شدید زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع بنوں میں کواڈ کاپٹر ڈرون حملے میں دو افراد ہلاک جبکہ تین زخمی ہو گئے ہیں۔

ذرائع کے مطابق واقعہ بنوں کے تھانہ جانی خیل کی حدود میں واقع علاقے نصری خیل میں پیش آیا، جہاں ڈرون سے کیے گئے حملے میں مینل ولد سیدل خان اور صدام ولد امن اللہ ہلاک ہو گئے، جبکہ حکمت اللہ، مومن خان اور نیاز ولی شدید زخمی ہوئے ہیں۔

لاشوں اور زخمیوں کو فوری طور پر ڈسٹرکٹ ہیڈ کوارٹر ہسپتال بنوں منتقل کیا گیا۔

واضح رہے کہ ضلع بنوں میں گزشتہ 24 گھنٹوں کے دوران یہ دوسرا ڈرون حملہ ہے۔

یاد رہے کہ خیبر پختونخوا اور قبائلی اضلاع میں پاکستانی سکیورٹی فورسز اور کالعدم تحریک طالبان پاکستان سمیت مختلف عسکریت پسند گروپ ڈرون ٹیکنالوجی کا استعمال کر رہے ہیں، جن کے نتیجے میں اکثر عام شہری بھی ہلاک ہو جاتے ہیں۔