بنوں :نامعلوم مسلح افراد کی فائرنگ، ٹریفک پولیس اہلکار ہلاک

بنوں(ڈیلی اردو) تھانہ بسیہ خیل کی حدود میں نامعلوم مسلح افراد کی فائرنگ سے ٹریفک پولیس اہلکار سیف اللہ خان ہلاک ہوگئے۔

پولیس کے مطابق فائرنگ کا واقعہ تھانہ بسیہ خیل کی حدود میں پیش آیا، جہاں نامعلوم مسلح افراد نے سیف اللہ خان کو نشانہ بنایا۔ گولیاں لگنے سے وہ شدید زخمی ہوگئے اور بعد ازاں زخموں کی تاب نہ لاتے ہوئے ہلاک ہوگئے۔

واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے کر شواہد اکٹھے کیے۔ پولیس نے حملہ آوروں کی گرفتاری کے لیے علاقے میں سرچ آپریشن شروع کر دیا ہے۔

پولیس حکام کا کہنا ہے کہ واقعے کی مختلف پہلوؤں سے تحقیقات جاری ہیں جبکہ حملہ آوروں کی تلاش کے لیے مشتبہ مقامات پر کارروائیاں کی جا رہی ہیں۔

سیف اللہ خان کی لاش ضروری قانونی کارروائی اور پوسٹ مارٹم کے لیے خلیفہ گلنواز ٹیچنگ ہسپتال بنوں منتقل کردی گئی ہے۔ پولیس کے مطابق ملزمان کی گرفتاری کے لیے تمام دستیاب وسائل بروئے کار لائے جا رہے ہیں اور علاقے میں سکیورٹی بھی مزید سخت کردی گئی ہے۔