بنوں: پاکستانی طالبان کے حملوں میں پولیس حوالدار ہلاک، سپاہی سمیت 4 بچے زخمی

بنوں (ڈیلی اردو ) پاکستان کے شورش زدہ صوبے خیبر پختونخوا کے ضلع بنوں میں میران شاہ روڈ پر باران شاہ پل کے قریب پولیس اور سیکیورٹی فورسز کے قافلے پر کالعدم تحریک طالبان پاکستان (ٹی ٹی پی) کے حملے میں حوالدار دوست محمد خان ہلاک اور سپاہی شمیم خان زخمی ہو گئے۔

بنوں پولیس کے ترجمان کاشف نواز خان کے مطابق اتوار دوپہر پولیس پارٹی تلاشی آپریشن کر رہی تھی کہ اچانک بارودی سرنگ (آئی ای ڈی) دھماکے کے ساتھ پھٹ گئی، جس کے بعد دہشت گرد بھاری ہتھیاروں سے حملہ کر گئے۔ سیکیورٹی فورسز کی جوابی کارروائی کے بعد حملہ آور پہاڑی علاقوں کی طرف فرار ہو گئے۔ باقی اہلکار محفوظ رہے اور علاقے میں سرچ آپریشن شروع کر دیا گیا ہے۔

بنوں میں کواڈ کاپٹر حملے میں چار بچے زخمی

دوسری جانب اتوار کی شام خدری مامند خیل علاقے میں کالعدم ٹی ٹی پی کے کواڈ کاپٹر نے ایک گھر کو نشانہ بنایا، جس کے نتیجے میں چار بچے زخمی ہو گئے۔

 پولیس کے مطابق زخمی بچوں کی عمریں 8 سے 13 سال کے درمیان ہیں اور انہیں ضلعی ہیڈکوارٹر اسپتال منتقل کیا گیا جہاں ان کی حالت خطرے سے باہر ہے۔ زخمی بچوں کی شناخت مامون، معصوم، سلمان اور مہمان کے نام سے ہوئی۔