بھارت : حزب المجاہدین سے مبینہ روابط،سکول ٹیچر کی ضمانت مسترد

دہلی(ڈیلی اردو) بھارت کے زیر انتظام کشمیر میں ایک دہشت گردی کے مقدمے میں گرفتار نجی اسکول کے استاد کو عدالت سے ضمانت نہ مل سکی۔ جموں کی خصوصی قومی تحقیقاتی ایجنسی (این آئی اے) عدالت نے تنویر احمد ملک کی درخواست ضمانت مسترد کر دی۔

خصوصی جج پریم ساگر نے فیصلے میں قرار دیا کہ مقدمے کے ریکارڈ پر موجود شواہد بادی النظر میں ملزم کے غیر قانونی اور دہشت گردی سے متعلق سرگرمیوں میں ملوث ہونے کی جانب اشارہ کرتے ہیں۔

عدالت نے یہ خدشہ بھی ظاہر کیا کہ اگر ملزم کو ضمانت پر رہا کیا گیا تو وہ مقدمے کی کارروائی کو متاثر کرنے کی کوشش کرسکتا ہے، بالخصوص گواہوں پر اثرانداز ہونے کا امکان موجود ہے۔

تنویر احمد ملک کا تعلق ڈوڈہ ضلع کے تنتنا گاؤں سے بتایا گیا ہے۔ اسے یکم مارچ 2021 کو دہشت گردی سے متعلق ایک مقدمے میں گرفتار کیا گیا تھا۔ بعد ازاں این آئی اے نے 22 مئی 2021 کو اس کیس میں سات افراد کے خلاف چارج شیٹ پیش کی، جن میں تین ہلاک شدہ دہشت گرد اسامہ بن جاوید، ہارون عباس وانی اور زاہد حسین بھی شامل تھے۔

مقدمے کی ابتدائی رپورٹ کشتواڑ پولیس اسٹیشن میں درج کی گئی تھی، جس میں غیر قانونی سرگرمیوں کی روک تھام کے قانون (یو اے پی اے)، آرمز ایکٹ، نارکوٹک ڈرگز اینڈ سائیکوٹروپک سبسٹینسز ایکٹ اور بھارتی تعزیراتِ ہند کی مختلف دفعات شامل کی گئی تھیں۔

استغاثہ کے مطابق ملزم پر الزام ہے کہ اس نے ڈوڈہ اور کشتواڑ کے علاقوں میں حزب المجاہدین سے وابستہ دہشت گردوں کو مبینہ طور پر پناہ، کھانا اور دیگر ضروری سہولتیں فراہم کیں۔

مقدمے کی بنیاد بننے والے واقعے کے مطابق 8 مارچ 2019 کو ہارون احمد وانی کی قیادت میں مسلح افراد نے کشتواڑ میں تعینات ہیڈ کانسٹیبل دلیپ سنگھ سے اس کی سرکاری رائفل، تین میگزین اور 90 کارتوس چھین لیے تھے۔ دلیپ سنگھ اُس وقت کشتواڑ کے ڈپٹی کمشنر کے ایسکارٹ انچارج کی ذمہ داری انجام دے رہا تھا اور ایک کرائے کے مکان میں رہائش پذیر تھا۔

خصوصی عدالت نے دستیاب ریکارڈ اور مقدمے کی نوعیت کو مدنظر رکھتے ہوئے تنویر احمد ملک کی ضمانت کی درخواست مسترد کردی۔