تربت: بلوچ عسکریت پسندوں کی فائرنگ سے دو افراد ہلاک، گاڑیوں کو بھی آگ لگا

کوئٹہ (ڈیلی اردو) پاکستان کے شورش زدہ صوبے بلوچستان کے ضلع کیچ کے علاقے سنگانی سر میں اتوار کی شام بلوچ عسکریت پسندوں کی فائرنگ سے دو افراد ہلاک ہو گئے، جبکہ حملہ آوروں نے جائے وقوعہ پر موجود گاڑیوں کو بھی آگ لگا دی۔

پولیس کے مطابق منیر مبارکی کے مہمان خانے میں داخل ہونے والے مسلح افراد نے منیر مبارکی کے اہل خانہ پر فائرنگ کی۔ اس حملے میں مصیب ولد حاجی حاصل اور مستی خان ولد منیر مبارکی موقع پر ہی ہلاک ہو گئے۔

عینی شاہدین نے بتایا کہ حملہ آور فائرنگ کے بعد بھیٹک کے صحن میں کھڑی گاڑیوں کو آگ لگا کر فرار ہو گئے۔

مقامی ذرائع کے مطابق ہلاک شدگان حکومتی حمایت یافتہ مسلح گروہ ڈیتھ اسکواڈ کے رکن تھے۔ تاحال کسی بھی گروہ نے واقعے کی ذمہ داری قبول نہیں کی ہے۔