تربت : سیکیورٹی فورسز کی کارروائی، بی ایل اے کے 2 دہشتگرد ہلاک

تربت(ڈیلی اردو) بلوچستان کے شورش زدہ ضلع ضلع تربت میں سیکورٹی فورسز نے خفیہ اطلاع کی بنیاد پر کارروائی کرتے ہوئے کالعدم بلوچستان لبریشن آرمی (بی ایل اے) سے وابستہ 2 دہشتگردوں کو ہلاک کردیا۔

ذرائع کے مطابق تربت کے علاقے میں دہشتگردوں کی موجودگی کی اطلاع ملنے پر سیکیورٹی فورسز نے آپریشن کیا۔ کارروائی کے دوران فورسز اور دہشتگردوں کے درمیان فائرنگ کا تبادلہ ہوا، جس میں 2 دہشتگرد مارے گئے۔

ہلاک دہشتگردوں کی لاشیں شناخت اور دیگر قانونی تقاضے مکمل کرنے کے لیے اسپتال منتقل کردی گئی ہیں۔ تاہم ان کی شناخت اور تنظیم میں کردار سے متعلق مزید تفصیلات سامنے نہیں آسکیں۔

سیکیورٹی حکام کے مطابق بلوچستان میں دہشتگرد عناصر کے خلاف انٹیلی جنس کی بنیاد پر کارروائیاں جاری ہیں، جن کا مقصد دہشتگرد گروہوں کے نیٹ ورک اور ان کے ٹھکانوں کا سراغ لگا کر انہیں نشانہ بنانا ہے۔

رپورٹ کے مطابق 31 اگست اور یکم ستمبر کو بلوچستان کے مختلف علاقوں میں ہونے والی الگ الگ کارروائیوں کے دوران 21 دہشتگرد ہلاک کیے گئے تھے، جبکہ ان کارروائیوں میں 6 سیکیورٹی اہلکار بھی ہلاک ہوئے تھے۔

تربت میں ہونے والی تازہ کارروائی کو بلوچستان میں سرگرم دہشتگرد گروہوں کے خلاف جاری سیکیورٹی آپریشن کا حصہ قرار دیا گیا ہے۔