تھائی لینڈ اور کمبوڈیا کے درمیان نیا سیزفائر معاہدہ

فنون پین/بینکاک (ڈیلی اردو) تھائی لینڈ اور کمبوڈیا نے ہفتے کے روز سرحدی تنازعے پر کئی ہفتوں سے جاری مسلح جھڑپوں کے خاتمے کے لیے جنگ بندی کے معاہدے پر دستخط کر دیے۔ 

معاہدے کے تحت نہ صرف لڑائی ختم کرنے بلکہ دونوں ممالک کی جانب سے کسی بھی نئی فوجی نقل و حرکت اور فوجی مقاصد کے لیے ایک دوسرے کی فضائی حدود کی خلاف ورزی پر بھی پابندی عائد کر دی گئی ہے۔ جھڑپوں کے دوران فضائی حملے صرف تھائی لینڈ کی جانب سے کیے گئے، جن میں آج ہفتے کی صبح تک کمبوڈیا کے اندر اہداف کو نشانہ بنایا گیا۔

معاہدے کی ایک اہم شق کے مطابق اگر جنگ بندی 72 گھنٹے تک مکمل طور پر برقرار رہی تو تھائی لینڈ جولائی میں گرفتار کیے گئے 18 کمبوڈین فوجیوں کو واپس بھیجے گا، جن کی رہائی کمبوڈیا کا بڑا مطالبہ ہے۔

دونوں ممالک نے جولائی میں ہونے والی پانچ روزہ لڑائی کے بعد طے پانے والی سابقہ جنگ بندی اور اس کے بعد ہونے والے معاہدوں پر بھی عملدرآمد کے عزم کا اعادہ کیا ہے۔ یہ ابتدائی جنگ بندی ملائیشیا کی ثالثی سے ممکن ہوئی تھی، جس میں امریکی صدر ڈونلڈ ٹرمپ کے دباؤ نے بھی اہم کردار ادا کیا تھا۔ ٹرمپ نے اس وقت خبردار کیا تھا کہ اگر دونوں ممالک جنگ بندی پر راضی نہ ہوئے تو تجارتی مراعات روک لی جائیں گی۔

اکتوبر میں ملائیشیا میں ہونے والے ایک علاقائی اجلاس میں، جس میں امریکی صدر بھی شریک تھے، اس معاہدے کو مزید تفصیل کے ساتھ باضابطہ شکل دی گئی۔ تاہم ان کوششوں کے باوجود دونوں ممالک کے درمیان پروپیگنڈا جنگ اور محدود سرحدی جھڑپیں جاری رہیں، جو دسمبر کے آغاز میں شدید لڑائی میں تبدیل ہو گئیں۔