جرمنی: کرسمس مارکیٹ پر حملے کے ملزم سعودی ڈاکٹر کو عمر قید کی سزا

برلن (ڈیلی اردو/نیوز ایجنسیاں) جرمنی کی ایک عدالت نے 2024 میں کرسمس سے قبل مشرقی شہر ماگڈے برگ کی تاریخی کرسمس مارکیٹ میں اپنی گاڑی ہجوم پر چڑھا کر 6 افراد کو ہلاک اور سینکڑوں دیگر کو زخمی کرنے والے سعودی ڈاکٹر کو جمعے کے روز عمر قید کی سزا سنا دی۔

ڈیٹا پوائیویسی کے جرمن قانون کے تحت ملزم کی شناخت ’طالب اے‘ کے نام سے ظاہر کی گئی ہے۔ وہ سعودی عرب سے تعلق رکھنے والا ایک ماہر نفسیات ہے،  جس کے بارے میں حکام کا کہنا ہے کہ وہ اسلام مخالف بیانات اور انتہائی دائیں بازو کے نظریات کا حامی تھا۔

استغاثہ کے مطابق ملزم نے کرائے پر لی گئی ایک بی ایم ڈبلیو گاڑی ایک منٹ اور چار سیکنڈ تک ایک عوامی ہجوم میں تیزی سے دوڑائی اور اس حملے کی منصوبہ بندی کئی ہفتوں تک کی گئی تھی۔

اس حملے میں 45 سے 75 سال تک کی عمر کی پانچ خواتین اور ایک 9 سالہ بچہ ہلاک ہوئے تھے، جبکہ سینکڑوں افراد کو قتل کرنے کی کوشش کے الزام میں بھی ملزم پر فرد جرم عائد کی گئی تھی۔

اسٹیٹ پراسیکیوٹرز کے مطابق ملزم نے ایک سول مقدمے کے فیصلے اور مختلف فوجداری شکایات میں ناکامی پر شدید مایوسی اور غصے کے باعث یہ حملہ کیا تھا اور شواہد کے مطابق اس نے یہ کارروائی اکیلے ہی انجام دی۔

عدالت نے ملزم کو ’غیر معمولی سنگین نوعیت‘ کے ساتھ عمر قید کی سزا سنائی، جس کے تحت وہ عمومی عمر قید کے برعکس 15 سال بعد بھی پیرول کا اہل نہیں ہو گا اور اسے معمول سے کہیں زیادہ عرصہ جیل میں گزارنا پڑے گا۔