جنوبی وزیرستان میں کواڈ کاپٹر حملہ، تین کمسن بچیاں ہلاک، چار زخمی

پشاور (ڈیلی اردو) پاکستان کے صوبہ خیبر پختونخوا کے قبائلی ضلع جنوبی وزیرستان لوئر کی تحصیل اعظم ورسک کے علاقے نرگسئی (سوئی خیلہ) میں گزشتہ رات ایک گھر پر مبینہ طور پر کواڈ کاپٹر کے ذریعے گولہ گرنے کے نتیجے میں تین کمسن بچیاں ہلاک جبکہ چار افراد زخمی ہو گئے۔

پولیس کے مطابق واقعہ مقامی رہائشی محمد گل عرف باگل کے گھر پیش آیا، جن کا تعلق وزیر قبیلے کی ذیلی شاخ دینور سے ہے۔ دھماکے کے نتیجے میں گھر کو شدید نقصان پہنچا، گھریلو سامان جل کر خاکستر ہو گیا جبکہ آٹھ بکریوں کی ہلاکت بھی رپورٹ ہوئی ہے۔

ہلاک ہونے والوں میں 15 سالہ مینکہ بی بی، 9 سالہ گلنازہ بی بی اور 6 سالہ بشروبانہ شامل ہیں۔

زخمیوں میں مزلہ بی بی، 13 سالہ خاطر، 4 سالہ نقیب اور 22 سالہ گل زادین شامل ہیں، جنہیں فوری طور پر ڈسٹرکٹ ہیڈکوارٹر ہسپتال وانا منتقل کیا گیا۔

ہسپتال انتظامیہ کے مطابق تمام زخمیوں کو فوری طبی امداد فراہم کر دی گئی ہے اور ان کی حالت اس وقت خطرے سے باہر بتائی جا رہی ہے۔

پولیس اور سکیورٹی حکام نے واقعے کی تحقیقات شروع کر دی ہیں۔