جنوبی وزیرستان: ہیلی کاپٹر شیلنگ میں خاتون کونسلر ہلاک، متعدد عسکریت پسند مارے گئے

واشنگٹن (ش ح ط) پاکستان کے شورش زدہ صوبے خیبر پختونخوا کے قبائلی ضلع جنوبی وزیرستان اپر کی تحصیل برمل کے علاقے مانڑا میں ہیلی کاپٹر سے کیے گئے فضائی حملے کے نتیجے میں مقامی خاتون کونسلر اشرفہ بی بی ہلاک ہو گئیں۔

مقامی انتظامیہ کے ایک اہلکار نے ڈیلی اردو کو بتایا کہ شیلنگ اس وقت کی گئی جب شدت پسندوں نے شہری آبادی میں پناہ لے رکھی تھی۔ کارروائی کے دوران متعدد عسکریت پسند مارے گئے اور کئی زخمی بھی ہوئے۔

وانا کونسلرز اتحاد نے اپنے بیان میں کہا کہ ہلاک ہونے والی اشرفہ بی بی وانا تحصیل کونسل کی رکن اور مولانا نور زمان کی اہلیہ تھیں۔ اتحاد نے عسکری قیادت اور سول انتظامیہ سے واقعے کی تحقیقات اور ذمہ دار اہلکاروں کے خلاف کارروائی کا مطالبہ کیا ہے۔

سیکورٹی ذرائع کے مطابق شدت پسندوں نے فورسز پر راکٹ فائر کیے جو مقامی گھروں میں جا گرے۔ ذرائع نے مزید بتایا کہ اسی دوران ایک گولہ گرنے سے اشرفہ بی بی ہلاک ہوئیں، جبکہ کارروائی میں دہشت گردوں کے متعدد ٹھکانے بھی تباہ کر دیے گئے۔