جنگ سے اجڑے لاکھوں لبنانیوں کی گھر واپسی شروع

بیروت (ڈیلی اردو) اقوام متحدہ نے کہا ہے کہ اسرائیل اور ایران نواز حزب اللہ کے درمیان جنگ کے باعث بے گھر ہونے والے آٹھ لاکھ سے زائد لبنانی شہری فائر بندی کے بعد بتدریج اپنے گھروں کو واپس لوٹ رہے ہیں۔

اقوام متحدہ کے دفتر برائے انسانی امداد (اوچا) کے مطابق 30 جولائی تک 821,077 بے گھر افراد اپنے آبائی علاقوں میں واپس جا چکے ہیں، تاہم اب بھی تقریباً 3 لاکھ 60 ہزار افراد بے گھر ہیں، جن میں سے لگ بھگ 26 ہزار سرکاری عارضی پناہ گاہوں میں مقیم ہیں۔

یہ اعلان ایسے وقت میں سامنے آیا ہے جب اٹلی کے دارالحکومت روم میں امریکی معاونت سے لبنان اور اسرائیل کے درمیان مذاکرات کا نیا دور جاری ہے، جس کا مقصد جنگ کا مستقل خاتمہ اور دیرپا امن کا قیام ہے۔

لبنان میں یہ جنگ رواں سال مارچ میں حزب اللہ کے اسرائیل پر راکٹ حملوں کے بعد شروع ہوئی تھی، جس کے جواب میں اسرائیل نے فضائی حملوں اور جنوبی لبنان میں زمینی کارروائیاں کیں۔

اقوام متحدہ کے مطابق اس جنگ میں 4,300 سے زائد افراد ہلاک ہوئے جبکہ 10 لاکھ سے زیادہ شہری بے گھر ہوئے تھے۔