حزب اللہ کو غیر مسلح کرنے کا پہلا مرحلہ مکمل کر لیا، لبنانی فوج

بیروت (ڈیلی اردو/اے ایف پی) لبنانی فوج نے جمعرات، 8 جنوری کو اعلان کیا ہے کہ اس نے اسرائیلی سرحد اور دریائے لیطانی کے درمیانی علاقے میں حزب اللہ کو غیر مسلح کرنے کے منصوبے کا پہلا مرحلہ کامیابی سے مکمل کر لیا ہے۔

خبر رساں ادارے اے ایف پی کے مطابق، اس جنوبی علاقے کا زیادہ تر حصہ اب فوج کے کنٹرول میں ہے، تاہم اسرائیل نے اب بھی پانچ تزویراتی سرحدی پوائنٹس پر اپنا قبضہ برقرار رکھا ہوا ہے۔ اسرائیل کا کہنا ہے کہ یہ قبضہ حزب اللہ کی دوبارہ مسلح ہونے کی کوششوں کو روکنے کے لیے ضروری ہے۔

ایک سال قبل طے پانے والے جنگ بندی معاہدے کے تحت حزب اللہ کو اپنی فورسز دریائے لیطانی کے شمال میں منتقل کرنا ہیں اور اپنا فوجی ڈھانچہ ختم کرنا ہے۔ لبنانی فوج نے عزم ظاہر کیا ہے کہ وہ سرنگوں کی تباہی اور مسلح گروہوں کو دوبارہ منظم ہونے سے روکنے کے لیے اپنی کارروائیاں جاری رکھے گی۔

لبنان کے آرمی کمانڈر روڈولف ہیکل نے حکومت کو اس پیش رفت پر بریفنگ دی۔ دوسری جانب، اسرائیلی وزیر خارجہ گیدون سعار نے ان کوششوں کو سراہا، لیکن انہیں ’’ناقابل اطمینان‘‘ قرار دیا۔

امریکہ، فرانس اور اقوام متحدہ پر مشتمل ایک کمیٹی اس جنگ بندی کی نگرانی کر رہی ہے۔