حوثی باغیوں کا سعودی فورسز پر حملے کا دعویٰ، 7 افراد ہلاک

صنعاء (ڈیلی اردو) ایران کے حمایت یافتہ حوثی باغیوں نے بحیرۂ احمر کے ساحلی علاقے میں واقع المخا بندرگاہ پر سعودی فورسز کے خلاف ایک بار پھر حملے کرنے کا دعویٰ کیا ہے۔

حوثی باغیوں کے ترجمان یحییٰ سریع نے ٹیلی گرام پر جاری ایک بیان میں کہا ہے کہ کارروائی کے دوران سعودی فورسز کے اسلحہ ذخیرہ کرنے والے مراکز کو نشانہ بنایا گیا۔

حوثیوں سے وابستہ ٹی وی چینل المسیرہ نے بھی حملوں کی تصاویر نشر کی ہیں، جن میں میزائل اور ڈرونز فائر کیے جاتے دکھائی دے رہے ہیں۔

یحییٰ سریع کے مطابق یہ حملے سعودی فورسز کے خلاف جاری کارروائیوں کا تسلسل ہیں۔

دوسری جانب یمنی فوج کے مطابق اتوار کو ہونے والے ایک حملے میں کم از کم 7 افراد ہلاک جبکہ درجنوں زخمی ہوئے تھے۔

یمنی حکام کے مطابق حملے کے بعد علاقے میں سکیورٹی سخت کر دی گئی ہے، جبکہ واقعے سے متعلق مزید تفصیلات سامنے آنے کا انتظار ہے۔