خاران میں مسافر گاڑی کو بارودی مواد سے نشانہ بنادیا گیا، 10 مزدور زخمی

خاران(ڈیلی اردو) بلوچستان کے شورش زدہ ضلع خاران میں لجے روڈ پر مسافر گاڑی کو مبینہ طور پر سڑک کنارے نصب دیسی ساختہ بم (آئی ای ڈی) کے ذریعے نشانہ بنایا گیا، جس کے نتیجے میں گاڑی میں سوار 10 مزدور زخمی ہوگئے۔

سیکیورٹی ذرائع کے مطابق دھماکے کے نتیجے میں ایک مزدور کو شدید نوعیت کی چوٹیں آئیں، جبکہ دیگر 9 افراد بھی زخمی ہوئے۔ واقعے کی اطلاع ملتے ہی سیکیورٹی اہلکار موقع پر پہنچ گئے اور زخمیوں کو ابتدائی طبی امداد کے بعد قریبی طبی مرکز منتقل کیا۔

ذرائع کے مطابق حملے میں مبینہ طور پر ایک مسلح گروپ کے عناصر ملوث ہوسکتے ہیں۔ واقعے کے بعد سیکیورٹی اہلکاروں نے علاقے کو گھیرے میں لے کر سرچ آپریشن شروع کردیا اور حملے میں ملوث افراد کی تلاش کے لیے کارروائیاں تیز کردی گئیں۔

مسافر گاڑی میں سوار مزدوروں کو نشانہ بنائے جانے کے واقعے کے بعد علاقے میں سیکیورٹی مزید سخت کردی گئی ہے، جبکہ واقعے کی تحقیقات اور حملے کے ذمہ دار عناصر کا سراغ لگانے کے لیے مختلف پہلوؤں سے کارروائی جاری ہے۔