خضدار: مسلح دہشت گردوں نے چار مزدور اغوا کر لیے

کوئٹہ (ڈیلی اردو) پاکستان کے شورش زدہ صوبہ بلوچستان کے ضلع خضدار میں نامعلوم مسلح دہشت گردوں نے چار مزدوروں کو اغوا کر لیا، جبکہ علاقے میں سکیورٹی فورسز نے واقعے کے بعد سرچ آپریشن شروع کر دیا ہے۔

سرکاری ذرائع کے مطابق اغوا کا واقعہ خضدار کے علاقے کرخ میں پیش آیا، جہاں مسلح دہشت گردوں نے آبپاشی منصوبے پر کام کرنے والے چار افراد کو اپنے ساتھ لے گئے۔

ذرائع کے مطابق اغوا ہونے والے افراد گزشتہ تین روز سے منصوبے پر کام کر رہے تھے، جن میں ایک پراجیکٹ مینیجر اور ایک سرویئر بھی شامل ہیں۔

حکام کا کہنا ہے کہ اغوا ہونے والوں میں دو افراد کا تعلق صوبہ سندھ جبکہ دو کا تعلق بلوچستان سے ہے۔ تاہم ان کی شناخت تاحال سرکاری طور پر جاری نہیں کی گئی۔

دوسری جانب خضدار شہر میں صدر تھانے پر دستی بم حملے اور وڈھ کے علاقے میں کوئٹہ۔کراچی شاہراہ متاثر ہونے کی بھی ابتدائی اطلاعات موصول ہوئی ہیں، تاہم متعلقہ حکام نے ان واقعات کی تفصیلات یا ممکنہ نقصانات کے بارے میں باضابطہ بیان جاری نہیں کیا۔

واضح رہے کہ اس سے قبل ضلع کیچ کے ہیڈکوارٹر تربت کے علاقے کلاتک میں بھی نامعلوم مسلح دہشت گردوں نے سات غیر مقامی مزدوروں کو اغوا کر لیا تھا، جن میں سے ایک مزدور کو بعد ازاں فائرنگ کر کے ہلاک کر دیا گیا، جبکہ دیگر چھ افراد کو نامعلوم مقام پر منتقل کر دیا گیا تھا۔

حکام کا کہنا ہے کہ دونوں واقعات کی تحقیقات جاری ہیں، جبکہ اغوا ہونے والے افراد کی بازیابی کے لیے سکیورٹی ادارے مختلف علاقوں میں کارروائیاں کر رہے ہیں۔