خیبرپختونخوا میں دہشت گردی کے 10 واقعات میں مائننگ بارودی مواد کے استعمال کا انکشاف

پشاور (ڈیلی اردو) پاکستان کے شورش زدہ صوبہ خیبرپختونخوا میں دہشت گردی کے حالیہ 10 واقعات میں مائننگ کے لیے استعمال ہونے والے بارودی مواد کے استعمال کا انکشاف ہوا ہے۔

پولیس حکام کے مطابق مختلف آئی ای ڈی دھماکوں میں مائننگ ایکسپلوسیو کے استعمال کے شواہد سامنے آئے ہیں، جس کے بعد سکیورٹی اداروں نے اس نئے خطرے کے تدارک کے لیے حکمت عملی تیار کرنے کا فیصلہ کیا ہے۔

حکام کا کہنا ہے کہ دہشت گردوں کی جانب سے حالیہ 10 مختلف واقعات میں اسی نوعیت کے بارودی مواد کے استعمال کی نشاندہی ہوئی ہے، جس سے سکیورٹی خدشات میں اضافہ ہوا ہے۔

پولیس ذرائع کے مطابق اس صورتحال سے نمٹنے کے لیے خیبرپختونخوا پولیس نے سی ٹی ڈی اور اسپیشل برانچ کی مشترکہ کمیٹیاں تشکیل دینے کا فیصلہ کیا ہے، جو نہ صرف مائننگ ایکسپلوسیو کے استعمال کی روک تھام پر کام کریں گی بلکہ بارودی مواد کے دیگر ممکنہ ذرائع کا بھی تفصیلی جائزہ لیں گی۔

حکام کے مطابق نئی حکمت عملی کا مقصد دہشت گردوں کو بارودی مواد تک رسائی روکنا اور صوبے میں دہشت گردی کے واقعات میں کمی لانا ہے۔ مزید تحقیقات جاری ہے۔