خیبرپختونخوا میں 2025 کے دوران دہشت گردی میں تشویشناک اضافہ، سی ٹی ڈی رپورٹ جاری

پشاور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) کی سال 2025 کی رپورٹ کے مطابق خیبرپختونخوا میں دہشت گردی اور جرائم کی سنگین نوعیت کے واقعات میں خطرناک حد تک اضافہ ریکارڈ کیا گیا ہے۔ رپورٹ میں انکشاف کیا گیا ہے کہ رواں سال صوبے میں بھتہ خوری، اغواء اور ٹارگٹ کلنگ کے سینکڑوں واقعات سامنے آئے۔

سی ٹی ڈی کے اعداد و شمار کے مطابق سال 2025 کے دوران خیبرپختونخوا میں 8 خودکش حملے ہوئے، جبکہ 14 اضلاع میں فائرنگ کے 557 واقعات رپورٹ کیے گئے۔ اسی عرصے میں شدت پسندوں کی جانب سے 54 ڈرون حملے، 160 بارودی مواد کے حملے، 68 دستی بم حملے اور 27 میزائل و راکٹ لانچر فائر کے واقعات پیش آئے۔

رپورٹ کے مطابق سیکیورٹی فورسز کی مختلف کارروائیوں کے دوران 348 شدت پسند ہلاک کیے گئے، جبکہ گزشتہ سال یہ تعداد 212 تھی، جو دہشت گرد سرگرمیوں میں اضافے کی واضح نشاندہی کرتی ہے۔

سی ٹی ڈی کے مطابق دہشت گردی کی معاونت کے الزام میں 183 مقدمات درج کیے گئے، جبکہ ٹیرر فنانسنگ کے 30 کیسز بھی سامنے آئے۔ دہشت گردوں کی جانب سے 84 افراد کو اغواء کیا گیا، بھتہ خوری کے 138 کیسز اور ٹارگٹ کلنگ کے 116 واقعات رپورٹ ہوئے۔ اسی دوران فورتھ شیڈول میں 4 ملزمان کو شامل کیا گیا۔

سیکیورٹی حکام کا کہنا ہے کہ صوبے میں امن و امان کی صورتحال سنگین ہوتی جا رہی ہے، جس کے پیش نظر انسداد دہشت گردی کی کارروائیوں کو مزید مؤثر بنانے اور انٹیلیجنس بیسڈ آپریشنز میں تیزی لانے کی ضرورت ہے۔