خیبر: حیات آباد کے قریب دو دن میں داعش کے 15 ارکان ہلاک، غیر ملکی بھی شامل

پشاور (ڈیلی اردو رپورٹ) پاکستان کے شورش زدہ صوبے خیبر پختونخوا کے قبائلی ضلع خیبر میں نامعلوم مسلح افراد کی کارروائیوں کے نتیجے میں دو دن کے دوران داعش کے 15 جنگجو ہلاک ہو گئے ہیں۔

گزشتہ شب پشاور کے قریب باڑہ کے علاقے قمبر خیل میں نامعلوم مسلح افراد نے داعش خراسان کے ٹھکانوں کو نشانہ بنایا، جس کے نتیجے میں مزید 11 عسکریت پسند ہلاک جبکہ تین زخمی ہوئے۔ 

ابتدائی اطلاعات کے مطابق ہلاک ہونے والوں میں زیادہ تر غیر ملکی ارکان شامل تھے، جو گزشتہ سال سے اس علاقے میں رہائش پذیر تھے۔

واضح رہے کہ ایک روز قبل بھی چار عسکریت پسندوں کی گولیوں سے چھلنی لاشیں برآمد ہوئی تھیں۔ 

ڈی پی او وقار احمد کے مطابق چاروں افراد کو فائرنگ کر کے ہلاک کیا گیا تھا اور پوسٹ مارٹم کے لیے لاشیں اسپتال منتقل کر دی گئی تھیں۔ ڈی پی او وقار احمد نے بتایا تھا کہ واقعے کی تحقیقات جاری ہیں۔

تاہم آج مزید 11 افراد کی لاشیں ملنے کے بعد ہلاکتوں کی مجموعی تعداد 15 ہو گئی ہے، جس پر پولیس نے تحقیقات کا دائرہ وسیع کر دیا ہے۔

ذرائع کے مطابق باڑہ کا شنکو علاقہ پشاور کے پوش علاقے حیات آباد سے صرف چند کلومیٹر کے فاصلے پر واقع ہے۔