خیبر میں انٹیلیجنس بیسڈ آپریشن، 22 دہشت گرد ہلاک

راولپنڈی (ک م) پاکستان کے شورش زدہ صوبہ خیبر پختونخوا کے قبائلی ضلع خیبر میں سیکیورٹی فورسز اور قانون نافذ کرنے والے اداروں کے انٹیلیجنس بیسڈ آپریشن میں 22 دہشت گرد ہلاک کر دیے گئے۔

پاک فوج کے شعبہ تعلقات عامہ (آئی ایس پی آر) کے مطابق آپریشن 21 اپریل کو کیا گیا، جہاں سیکیورٹی فورسز نے دہشت گردوں کے ٹھکانے کو نشانہ بنایا۔ کارروائی کے دوران شدید فائرنگ کے تبادلے میں 22 دہشت گرد مارے گئے۔

آئی ایس پی آر کے مطابق گرفتاری کے خوف میں دہشت گردوں نے اندھا دھند فائرنگ کی، جس کی زد میں آ کر ایک 10 سالہ بچہ ہلاک ہو گیا۔

بیان میں کہا گیا ہے کہ ہلاک دہشت گردوں کے قبضے سے اسلحہ اور گولہ بارود بھی برآمد کیا گیا۔ 

سیکیورٹی حکام کے مطابق مارے گئے دہشت گرد علاقے میں متعدد کارروائیوں میں ملوث تھے۔

آئی ایس پی آر نے بتایا کہ علاقے میں مزید دہشت گردوں کے خاتمے کے لیے سرچ اور کلیئرنس آپریشن جاری ہے۔

صدر مملکت آصف علی زرداری نے کامیاب کارروائی پر سیکیورٹی فورسز کو خراج تحسین پیش کرتے ہوئے 10 سالہ بچے کی ہلاکت پر افسوس کا اظہار کیا اور اہل خانہ سے تعزیت کی۔

وزیر اعظم شہباز شریف نے بھی آپریشن کو کامیاب قرار دیتے ہوئے کہا کہ 22 دہشت گردوں کی ہلاکت سیکیورٹی فورسز کی پیشہ ورانہ صلاحیتوں کا ثبوت ہے، اور قوم فورسز کے شانہ بشانہ کھڑی ہے۔