خیبر میں بڑا آپریشن: وادی تیراہ سے ایک لاکھ 30 ہزار افراد کی منتقلی کا آغاز

خیبر (نمائندہ ڈیلی اردو)پاکستان کے شورش زدہ صوبے خیبرپختونخوا کے قبائلی ضلع خیبر کی وادیٔ تیراہ کے دور افتادہ علاقے میدان ملک دین خیل سے متاثرہ آبادی کی نقل مکانی کیلئے رجسٹریشن کا عمل گزشتہ تین روز سے جاری ہے، جبکہ ضلعی انتظامیہ کے طے شدہ شیڈول کے مطابق 10 جنوری سے باقاعدہ طور پر نقل مکانی کا عمل شروع کیا جائے گا۔

ضلعی انتظامیہ ذرائع کے مطابق وادیٔ تیراہ کے علاقے پائیندی چینہ میں متاثرین کیلئے خصوصی رجسٹریشن سینٹر قائم کیا گیا ہے، جہاں اب تک 2500 سے زائد خاندانوں کی رجسٹریشن مکمل کی جا چکی ہے۔

انتظامیہ کے مطابق رجسٹرڈ خاندانوں میں سے 176 خاندانوں کو نادرا اور دیگر متعلقہ اداروں سے کلئیرنس کے بعد ابتدائی طور پر ڈھائی لاکھ روپے فی خاندان مالی امداد فراہم کر دی گئی ہے، جبکہ دیگر رجسٹرڈ خاندانوں کو بھی مرحلہ وار ایڈوانس مالی امداد دی جا رہی ہے۔

ضلعی انتظامیہ نے بتایا کہ نقل مکانی کا عمل 10 جنوری سے شروع ہو کر 25 جنوری تک جاری رہے گا۔ نقل مکانی کرنے والے ہر خاندان کو ڈھائی لاکھ روپے ایڈوانس جبکہ ماہانہ 50 ہزار روپے امدادی رقم فراہم کی جائے گی، جس کے ذریعے متاثرین اپنی مرضی کے مطابق رہائش اختیار کر سکیں گے۔

انتظامیہ کے مطابق علاقے میں دہشت گردوں کے خلاف جاری آپریشن آئندہ دو ماہ کے اندر مکمل کر لیا جائے گا، جس کے بعد متاثرین کی واپسی اور بحالی کا عمل 5 اپریل سے شروع کیا جائے گا۔

حکام نے مزید بتایا کہ وادیٔ تیراہ کے علاقے میدان کی مجموعی آبادی تقریباً ایک لاکھ 30 ہزار افراد پر مشتمل ہے۔ آپریشن کے دوران مکمل طور پر تباہ ہونے والے مکانات کا معاوضہ 30 لاکھ روپے جبکہ جزوی طور پر تباہ ہونے والے مکانات کیلئے 10 لاکھ روپے معاوضہ مقرر کیا گیا ہے۔