خیبر میں ڈرون حملہ، ایک بچی ہلاک، 7 افراد زخمی، احتجاجی دھرنا جاری

واشنگٹن (ش ح ط) پاکستان کے شورش زدہ صوبہ خیبر پختونخوا کے  قبائلی ضلع خیبر میں مبینہ ڈرون حملے کے نتیجے میں ایک لڑکی ہلاک جبکہ 7 افراد زخمی ہو گئے۔

تفصیلات کے مطابق خیبر کے تھانہ ملوارڈ کے علاقے کڑاپہ میں سکیورٹی فورسز کے آپریشن کے دوران ایک ڈرون مقامی گھر پر گرا، جس کے نتیجے میں ایک بچی ہلاک ہو گئی جبکہ دو خواتین اور بچوں سمیت دیگر افراد زخمی ہوئے۔

ریسکیو ذرائع کے مطابق زخمیوں کو فوری طور پر طبی امداد کے لیے قریبی ہسپتال منتقل کر دیا گیا، جہاں دو خواتین کی حالت تشویشناک بتائی جا رہی ہے۔

واقعے کے بعد علاقے میں خوف و ہراس پھیل گیا اور مقامی افراد بڑی تعداد میں جائے وقوعہ پر جمع ہو گئے۔ زخمیوں کی عیادت کے لیے عبدالغنی آفریدی، باڑہ تاجر برادری کے صدر حاجی سید ایاز وزیر، حاجی عجب خان آفریدی اور ملک عطاء اللہ بھی ہسپتال پہنچ گئے۔

دوسری جانب سکیورٹی حکام نے واقعے کی ذمہ داری دہشت گردوں پر عائد کرتے ہوئے کہا ہے کہ سکیورٹی فورسز کی کارروائی کے دوران جب دہشت گردوں کا گھیراؤ تنگ ہوا تو فورسز کی توجہ ہٹانے کے لیے دہشت گردوں نے اکاخیل باڑہ میں سویلین آبادی کو نشانہ بناتے ہوئے ایک مقامی گھر پر کواڈ کاپٹر حملہ کیا، جس میں ایک معصوم بچی ہلاک ہوئی۔

ادھر خیبر باڑہ اکاخیل میں بچوں پر مبینہ ڈرون حملے کے خلاف پشاور رنگ روڈ ٹول پلازہ پر احتجاجی دھرنا جاری ہے۔ مظاہرین کے مطابق پولیس نے دھرنے کے شرکا پر ہوائی فائرنگ بھی کی، تاہم اس کے باوجود احتجاج جاری ہے۔

دھرنے میں ایم این اے اقبال آفریدی اور مقامی ایم پی اے بھی شریک ہیں۔ 

مظاہرین کا کہنا ہے کہ اگر وزیراعلیٰ ہلاک بچی کی نماز جنازہ میں شرکت کریں اور آئندہ بے گناہ شہریوں پر ڈرون حملے نہ ہونے کی ضمانت دی جائے تو احتجاج ختم کیا جا سکتا ہے۔