خیبر پختونخوا: خیبر میں سکیورٹی فورسز کی کارروائیاں، 5 دہشت گرد ہلاک

خیبر (نمائندہ ڈیلی اردو)پاکستان کے شورش زدہ صوبے خیبر پختونخوا کے قبائلی ضلع خیبر میں سکیورٹی فورسز نے دو الگ الگ کارروائیوں کے دوران پانچ دہشت گرد ہلاک کر دیے۔

ضلع خیبر کے ڈسٹرکٹ پولیس آفیسر وقاص احمد کے مطابق پہلی کارروائی شاکس بائی پاس روڈ پر کی گئی، جہاں سی ٹی ڈی کو خفیہ اطلاع ملی تھی کہ دہشت گرد علاقے میں موجود ہیں اور کسی بڑی کارروائی کی منصوبہ بندی کر رہے ہیں۔

اطلاع ملنے پر سی ٹی ڈی اہلکاروں نے فوری کارروائی کرتے ہوئے دہشت گردوں کے ٹھکانے کو گھیرے میں لے لیا۔ اس دوران فائرنگ کے تبادلے میں تین دہشت گرد ہلاک ہو گئے، جبکہ ان کے دو ساتھی اندھیرے کا فائدہ اٹھاتے ہوئے فرار ہو گئے۔

ڈی پی او کے مطابق ہلاک دہشت گردوں کے قبضے سے تین کلاشنکوفیں، کارتوس اور دیگر اسلحہ برآمد کیا گیا۔ پولیس حکام کا کہنا ہے کہ اسی علاقے میں دو روز قبل دہشت گردوں نے اسپیشل برانچ کے ایک اہلکار کو فائرنگ کر کے ہلاک کیا تھا۔

دوسری کارروائی ضلع خیبر کے علاقے ملک دین خیل میں کی گئی، جہاں سکیورٹی فورسز نے دہشت گردوں کی موجودگی کی اطلاع پر سرچ اینڈ اسٹرائیک آپریشن کیا۔

آپریشن کے دوران فائرنگ کے تبادلے میں دو دہشت گرد ہلاک ہو گئے۔ کارروائی کے بعد جائے وقوعہ سے ایک مشین گن اور بھاری مقدار میں کارتوس برآمد کیے گئے۔

سکیورٹی ذرائع کے مطابق ہلاک دہشت گرد مختلف دہشت گردانہ سرگرمیوں میں ملوث تھے اور علاقے میں امن و امان کی صورتحال کو خراب کرنے کی کوشش کر رہے تھے۔