خیبر پختونخوا: لوئر دیر میں دھماکا، دو فوجی ہلاک، ایک شہری زخمی

راولپنڈی (کاشف محمود) صوبہ خیبر پختونخوا کے ضلع لوئر دیر میں دھماکے سے پاکستانی فوج کے دو اہلکار ہوگئے۔

پاکستانی فوج کے شعبہ تعلقات عامہ آئی ایس پی آر کے مطابق دیر کے علاقے باروال میں دھماکا ہوا جس کے نتیجے میں فوج کے دو اہلکار ہلاک ہو گئے۔

نمائندہ ڈیلی اردو کے مطابق لوئر دیر میں بارا بانڈہ میں بارودی سرنگ کے دھماکے میں دو فوجی ہلاک ہوگئے، دھماکے میں دیگر دو افراد بھی زخمی ہوئے جن میں ایک سماجی کارکن ریاست بھی شامل ہے۔

ذرائع نے ڈیلی اردو کو بتایا کہ فوجی اہکار قدرتی چشمے سے پانی سپلائی کرنے والے کنکشن کی مرمت کے کام میں مصروف تھے کہ ان کے قریب دھماکا ہوا۔

دھماکے کے فوری بعد پولیس کی بھاری نفری جائے وقوعہ پر پہنچی اور علاقے کو گھیرے میں لے لیا۔

آئی ایس پی آر کے مطابق سپاہی ساجد علی اور سپاہی عدنان ممتاز کا تعلق آزاد کشمیر سے تھا۔

شعبہ تعلقات عامہ کا کہنا ہے کہ پاکستانی فوج دہشتگردی کے خاتمے کے لیے پرعزم ہے اور ہمارے بہادر جوانوں کی قربانیاں رائیگاں نہیں جائیں گی۔

خیال رہے کہ اس سے قبل شمالی وزیرستان میں فوجی قافلے پر خودکش بم حملے کے نتیجے میں پاکستانی فوج کے 4 اہلکار ہلاک ہو گئے جن میں 2 لانس نائیک رینک کے افسران شامل تھے۔

شعبۂ تعلقاتِ عامہ (آئی ایس پی آر) پاکستانی فوج کا کہنا تھا کہ فوجی قافلے کو شمالی وزیرستان کے علاقے میر علی میں خودکش حملے کا نشانہ بنایا گیا۔