خیبر پختونخوا میں شدت پسند حملے، سوات اور لکی مروت میں افسر سمیت دو پولیس اہلکار ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے اضلاع سوات اور لکی مروت میں شدت پسندوں کے حملوں میں ایک پولیس افسر سمیت دو اہلکار ہلاک ہو گئے۔

سیاحتی ضلع سوات کے علاقے سنگوٹہ میں ایلیٹ فورس کے اہلکار حماد علی کو شدت پسندوں نے گھر کے قریب فائرنگ کر کے نشانہ بنایا۔ 

پولیس ذرائع کے مطابق حماد علی لوئر دیر میں تعینات تھے اور چھٹی پر اپنے گھر آئے ہوئے تھے۔ واقعے کے بعد ان کی لاش پوسٹ مارٹم کے لیے سیدو ٹیچنگ ہسپتال منتقل کر دی گئی، جبکہ ڈی پی او محمد عمر کے مطابق شواہد اکٹھے کر کے تحقیقات شروع کر دی گئی ہیں۔

دوسری جانب ضلع لکی مروت میں تھانہ پیزو کی حدود وانڈہ جوگی کے قریب شدت پسندوں کی فائرنگ سے اسسٹنٹ سب انسپیکٹر (اے ایس آئی) ممتاز علی ہلاک ہو گئے۔ پولیس ترجمان کے مطابق ممتاز علی تھانہ سٹی ٹانک میں بطور محرر خدمات انجام دے رہے تھے اور چھٹی پر اپنے گاؤں آئے ہوئے تھے۔

ترجمان کے مطابق واپسی کے دوران شدت پسندوں نے انہیں گاڑی سے اتار کر فائرنگ کا نشانہ بنایا۔ پولیس کا کہنا ہے کہ لاش کو پوسٹ مارٹم کے لیے مقامی ہسپتال منتقل کر دیا گیا ہے اور واقعے کی تحقیقات جاری ہیں۔