خیبر پختونخوا: ٹانک میں شدت پسندوں نے دو سکول دھماکوں سے اڑا دیے

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع ٹانک میں شدت پسندوں نے ایک ہی روز میں گرلز پرائمری سکول (کڑی عمر خان) اور گورنمنٹ ہائی سکول برائے لڑکے (گاؤں اکبری) کو بارودی مواد سے اڑا دیا۔ دونوں حملوں میں عمارتوں کو جزوی نقصان پہنچا جبکہ پولیس اور سیکیورٹی فورسز نے علاقے کا محاصرہ کر لیا۔

ڈیلی اردو کے مطابق دونوں واقعات نے علاقے میں شدید خوف و ہراس پھیلا دیا ہے، جس کے بعد پولیس اور سیکیورٹی فورسز نے دونوں مقامات پر مشترکہ سرچ آپریشن شروع کر دیا ہے۔

پولیس کے مطابق پہلا دھماکہ تھانہ صدر کی حدود کڑی عمر خان میں علی الصبح ہوا، جہاں شدت پسندوں نے گرلز پرائمری سکول کو بارودی مواد سے نشانہ بنایا۔ دھماکے کی آواز دور دور تک سنی گئی اور عمارت کا بڑا حصہ تباہ ہو گیا۔ اطلاع ملتے ہی پولیس اور سیکیورٹی فورسز کی بھاری نفری جائے وقوعہ پر پہنچ گئی۔

ذرائع کے مطابق اسی روز دوسرا دھماکہ تھانہ گل امام کی حدود گاؤں اکبری میں پیش آیا، جہاں شدت پسندوں نے گورنمنٹ ہائی سکول برائے لڑکے کو دھماکے سے اڑا دیا، جس سے عمارت کو جزوی نقصان پہنچا۔

علاقہ مکینوں کا کہنا ہے کہ اس سے قبل بھی کڑی عمر خان میں گرلز سکول کو دھماکے سے تباہ کیا گیا تھا، جس کے بعد علاقے میں تعلیم دشمن سرگرمیوں پر تشویش میں اضافہ ہو گیا ہے۔

پولیس حکام کے مطابق ابتدائی تحقیقات میں دونوں حملوں کے پیچھے منظم منصوبہ بندی کے شواہد ملے ہیں، جبکہ شدت پسندوں کی تلاش کے لیے سرچ آپریشن جاری ہے۔

ٹانک اور جنوبی اضلاع میں گزشتہ چند ہفتوں کے دوران شدت پسندوں کی کارروائیوں میں خطرناک حد تک اضافہ ہوا ہے، جس کی وجہ سے شہریوں اور تعلیمی عملے میں عدم تحفظ کی فضا برقرار ہے۔