دہشت گردی کے خاتمے تک جنگ جاری رہیگی، پاکستانی وزیراعظم شہباز شریف

اسلام آباد (ڈیلی اردو، ےا ایف پی، ڈی پی اے، روئٹرز)  پاکستانی وزیراعظم شہباز شریف نے بلوچستان میں عسکریت پسندوں کے حملوں کے جواب میںسکیورٹی فورسز کی کارروائیوں کو سراہتے ہوئے اس دہشت گردی کے مکمل خاتمے تک جنگ جاری رکھنے کے عزم کا اظہار کیا ہے۔

بلوچستان میں ہفتے کے روز مسلح علیحدگی پسندوں نے ایک منظم حکمت عملی کے تحت صوبے کے مختلف علاقوں میں بیک وقت حملے کیے، جن میں کم از کم 10 سکیورٹی اہلکار اور 11 مقامی شہری ہلاک ہوئے۔ سکیورٹی فورسز کے مطابق بھرپور جوابی کارروائیوں میں کم از کم 67 عسکریت پسند مارے گئے جبکہ گزشتہ دو دنوں میں ہلاک ہونے والے عسکریت پسندوں کی تعداد 108 سے تجاوز کر گئی ہے۔

ڈی ڈبلیو کے مطابق ان حملوں کے دوران صوبائی دارالحکومت  میں دھماکوں کی آوازیں سنی گئیں، سڑکیں سنسان ہو گئیں اور موبائل فون سروس معطل کر دی گئی جبکہ ٹرین سروس بھی روک دی گئی۔

کوئٹہ میں تعینات سینئر سکیورٹی اہلکار نوید حیدر نے ڈی ڈبلیو سے گفتگو میں بتایا، ’’یہاں ایک منظم منصوبے کے تحت غیر یقینی صورتحال پیدا کرنے کی کوشش کی جا رہی ہے۔ اس وقت صورتحال مکمل حکومتی کنٹرول میں ہے اور امن کی بحالی کے لیے اضافی نفری تعینات کر دی گئی ہے۔‘‘

دوسری جانب قبائلی رہنما وڈیرہ خدا بخش مری نے صوبائی حکومت کو تنقید کا نشانہ بناتے ہوئے کہا، ’’بلوچستان کے حالات موجودہ صوبائی حکومت کی ناقص پالیسیوں کے باعث خراب ہو رہے ہیں۔ پہلے ان لوگوں کا احتساب ہونا چاہیے، جو اس تباہی کے ذمہ دار ہیں۔ یہ پاکستان کے خلاف ایک کثیر جہتی جنگ ہے، جس کا مقابلہ صرف عسکری طاقت سے نہیں بلکہ قومی اتحاد، مؤثر سفارت کاری اور انفارمیشن وارفیئر سے ممکن ہے۔‘‘

حکام کے مطابق کئی علاقوں میں اب بھی سکیورٹی کلیئرنس آپریشن جاری ہے جبکہ اغوا کیے گئے ایک ضلعی ڈپٹی کمشنر اور جیل سے چھڑائے گئے قیدیوں کی تلاش بھی جاری ہے۔