راولپنڈی میں سرچ آپریشن، کمانڈر سمیت 16 افغان باشندے گرفتار

راولپنڈی (ڈیلی اردو) صوبہ پنجاب کے ضلع راولپنڈی میں سیکورٹی آپریشن کے دوران کمانڈر سمیت 16 افغان باشندے گرفتار کر لیے گئے۔

پولیس کے مطابق تھانہ مورگاہ کے علاقے میں رات گئے پولیس اور قانون نافذ کرنے والے اداروں کی جانب سے سرچ آپریشن کیا گیا، جس میں اہم افغان کمانڈر عبدالمالک کو گرفتار کرلیا گیا۔

پولیس کے مطابق آپریشن کے دوران مزید 16 افغان باشندے بھی گرفتار کرلیے گئے، جو غیر قانونی طور پر رہائش پذیر تھے۔

ذرائع کے مطابق گرفتار کمانڈر عبدالمالک، اشرف غنی کے دورِ حکومت میں بطور کمانڈر افغانستان کام کرتا رہا اور اشرف غنی کے دورِ حکومت کے بعد عبدالمالک افغانستان سے غائب ہو گیا تھا۔

افغان کمانڈر عبدالمالک سمیت گرفتار کیے گئے تمام افغان باشندوں کو حاجی کیمپ منتقل کر دیا گیا ہے۔

گرفتار افراد کے پاس پاکستان میں قیام سے متعلق کوئی دستاویزات موجود نہیں تھیں۔ تمام گرفتار افراد کو افغانستان ڈی پورٹ کیا جائے گا۔