روس اور یوکرین کے درمیان فوجیوں کی 1,035 لاشوں کا تبادلہ

ماسکو/کییف (ڈیلی اردو) روس اور یوکرین کے درمیان جنگ میں ہلاک ہونے والے فوجیوں کی لاشوں کا تبادلہ کیا گیا ہے۔

ایک اعلیٰ روسی عہدیدار نے جمعرات کے روز بتایا کہ روس نے 1,000 یوکرینی فوجیوں کی جسمانی باقیات کییف حکومت کے حوالے کر دی ہیں، جبکہ بدلے میں یوکرین نے بھی 35 روسی فوجیوں کی لاشیں واپس ماسکو کے حوالے کر دی ہیں۔

دونوں جنگی فریق باقاعدگی سے جنگ میں ہلاک ہونے والے فوجیوں کی لاشوں کا تبادلہ کرتے رہتے ہیں، جو آپس میں تعاون کے ایسے چند محدود شعبوں میں سے ایک ہے، جو ابھی تک متاثر نہیں ہوئے۔

ماسکو کے اعلیٰ مذاکرات کار ولادیمیر میدنسکی نے سوشل میڈیا پر ایک پوسٹ میں لکھا، ’’ایک ہزار یوکرینی فوجیوں کی لاشیں یوکرین کے حوالے کی گئیں۔ روس کو 35 روسی جنگجوؤں کی لاشیں دی گئیں۔‘‘

انہوں نے ساتھ ہی ایک تصویر بھی شیئر کی، جس میں سفید لباس اور نیلے دستانے پہنے افراد کو ایک ریفریجریٹڈ ٹرک کے پچھلے حصے سے سفید باڈی بیگز اٹھاتے ہوئے دکھایا گیا ہے۔

فروری 2022 میں ماسکو کی جانب سے یوکرین پر بھرپور فوجی حملے کے ساتھ شروع ہونے والی روسی یوکرینی جنگ میں گزشتہ چار برسوں کے دوران مجموعی طور پر لاکھوں فوجی ہلاک یا زخمی ہو چکے ہیں۔

جمعرات 26 فروری کے روز دونوں ممالک کے مذاکرات کار جنیوا میں امریکی حکام کے ساتھ الگ الگ ملاقاتوں میں شریک ہوئے۔ یہ بات چیت امریکی صدر ڈونلڈ ٹرمپ کی جانب سے اس جنگ کے خاتمے کی کوششوں کے تحت جاری ایک پیچیدہ مذاکراتی عمل کا حصہ ہے۔