روس میں انٹیلیجنس چیف پر حملہ، ایک ملزم دبئی سے گرفتار، ایک یوکرین فرار

ماسکو (ڈیلی اردو/ٹاس) روسی فوجی انٹیلیجنس کے نائب سربراہ ولادیمیر الیکسیف پر فائرنگ کے واقعے کے بعد روسی حکام نے دو مشتبہ افراد کو گرفتار کر لیا ہے جبکہ ایک اور مبینہ ساتھی کے یوکرین فرار ہونے کی اطلاعات ہیں۔ 

يہ واقعہ گزشتہ جمعے کے روز ماسکو کے شمال مشرقی علاقے میں ایک رہائشی عمارت میں پیش آیا تھا، جس میں الیکسیف شدید زخمی ہو گئے تھے۔ 

روسی خبر رساں ایجنسی ٹاس کے مطابق، روس کی داخلی انٹیلیجنس سروس ایف ایس بی نے بتایا ہے کہ اس حملے کے شبے میں 1960ء میں پیدا ہونے والے ایک روسی شہری کو دبئی میں گرفتار کیا گیا، جہاں سے اسے ماسکو کے حکام کے حوالے کر دیا گیا۔ 

تفتیش کاروں کے مطابق ایک دوسرے مشتبہ ساتھی کو پہلے ہی ماسکو میں حراست ميں ليا جا چکا ہے۔ حکام کا کہنا ہے کہ ایک تیسرا مبینہ معاون حملے کے فوراً بعد یوکرین فرار ہو گیا تھا۔

روسی تحقیقاتی اداروں نے الزام عائد کیا ہے کہ فائرنگ کا یہ واقعہ یوکرینی خفیہ اداروں کے احکامات پر انجام دیا گیا۔ 

تفتیش کاروں نے دعویٰ کیا کہ حملہ آور ’’یوکرینی انٹیلیجنس کی ہدایات پر‘‘ عمل کر رہا تھا۔ اسی نوعیت کے الزامات روسی وزیرِ خارجہ سريگئی لاوروف بھی پہلے لگا چکے ہیں، جنہوں نے کییف کو اس کارروائی کا ذمہ دار قرار دیا تھا۔ 

پولیس اور پراسیکیوشن حکام نے واقعے کے بعد قتل کی کوشش کا مقدمہ درج کر لیا ہے۔ واقعے کی وجوہات اور محرکات کے تفصیلی تعین کے لیے تفتیش جاری ہے۔