روس نے ایک ہزار سے زائد کینیائی شہری یوکرین جنگ میں بھیجے، رپورٹ

نیروبی(ڈیلی اردو) کینیا کی پارلیمنٹ میں پیش کی گئی ایک انٹیلیجنس رپورٹ کے مطابق ایک ہزار سے زائد کینیائی شہری روسی فوج کے لیے یوکرین میں لڑنے گئے، جن میں سے بیشتر سے مبینہ طور پر دھوکے سے فوجی معاہدوں پر دستخط کروائے گئے۔

متعدد میڈیا تحقیقات، جن میں اس ماہ کے اوائل میں اے ایف پی کی رپورٹ بھی شامل ہے، کے مطابق روس نے افریقی ممالک کے مردوں کو پُرکشش ملازمتوں کے وعدوں کے ذریعے راغب کیا، مگر بعد میں انہیں یوکرین کے خلاف لڑنے پر مجبور کر دیا گیا۔

رکن پارلیمان کیمانی آئیچونگ واہ نے بتایا کہ کینیائی شہری سیاحتی ویزوں پر استنبول، ترکی، ابو ظہبی اور متحدہ عرب امارات کے راستے روسی فوج میں شمولیت کے لیے ملک چھوڑتے ہیں۔

انہوں نے کہا کہ کے ہوائی اڈے پر سرحدی نگرانی سخت کیے جانے کے بعد بھرتی ہونے والے افراد اب گرفتاری سے بچنے کے لیے دیگر افریقی ممالک کا رخ کر رہے ہیں۔

کینیا کے وزیر خارجہ موسالیا موداوادی اگلے ماہ اس معاملے پر بات چیت کے لیے ماسکو کا دورہ کریں گے، جبکہ حکومت نے اپنے شہریوں کو ’’توپ کا چارہ‘‘ بنانے کی مذمت کی ہے۔

یوگینڈا اور جنوبی افریقہ بھی ان دیگر افریقی ممالک میں شامل ہیں جہاں سے روس نوجوانوں کو فوج میں بھرتی کے لیے لے جا رہا ہے، کیونکہ یوکرین میں اسے بھاری جانی نقصان کا سامنا ہے۔