سانحہ ساہیوال کیس کی اہم سماعت آج لاہور ہائیکورٹ میں ہوگی

لاہور (نیوز ڈیسک) سانحہ ساہیوال کے حوالے سے کیس کی سماعت آج لاہور ہائی کورٹ میں ہوگی، جے آئی ٹی کے سربراہ عدالت میں اپنی تفصیلی رپورٹ پیش کریں گے۔

تفصیلات کے مطابق سانحہ ساہیوال سے متعلق کیس کی اہم سماعت آج لاہور ہائیکورٹ میں ہوگی، چیف جسٹس لاہور ہائی کورٹ سردار محمد شمیم خان کی سربراہی میں دورکنی بنچ سانحہ ساہیوال کیس کی سماعت کرے گا۔

جے آئی ٹی کے سربراہ اعجاز شاہ عدالت میں اپنی تفصیلی رپورٹ پیش کریں گے، عدالت نے گزشتہ سماعت میں جے آئی ٹی کے سربراہ اعجاز شاہ کو رپورٹ سمیت پیش ہونے کا حکم دیا تھا۔

گزشتہ سماعت پر چیف جسٹس نے مقتولین کے ورثاء کو سیشن جج سے معاملے کی جوڈیشل انکوائری کروانے کی بھی پیشکش کی تھی جس پرجواب کے لیے وکلاء نے مہلت کی استدعا کی تھی۔

مقتول خلیل کے بھائی جلیل اور ذیشان کے بھائی احتشام نے سانحہ ساہیوال کی تحقیقات کے لیے جوڈیشل کمیشن تشکیل دینےکے لیے درخواستیں دائر کر رکھی ہیں۔