سندھ: لاڑکانہ میں سیشن جج کے اسکواڈ پر حملہ، ایک پولیس اہلکار ہلاک، 2 زخمی

لاڑکانہ (نمائندہ ڈیلی اردو) صوبہ سندھ کے ضلع لاڑکانہ میں سیشن جج کے سیکیورٹی اسکواڈ پر نامعلوم مسلح افراد نے حملہ کر دیا، جس کے نتیجے میں ایک پولیس اہلکار ہلاک جبکہ دو دیگر اہلکار زخمی ہو گئے۔

پولیس حکام کے مطابق واقعہ خیرپور روڈ پر اس وقت پیش آیا جب سیشن جج لاڑکانہ، مسکان خان سکھر سے لاڑکانہ واپس جا رہے تھے۔ جج کے قافلے کو نشانہ بنانے والا یہ واقعہ ٹنڈو مستی تھانے کی حدود میں پیش آیا۔

ابتدائی اطلاعات کے مطابق، نامعلوم حملہ آوروں نے سیشن جج کے اسکواڈ پر اچانک اندھا دھند فائرنگ کی۔ فائرنگ کے نتیجے میں اسکواڈ میں شامل پولیس اہلکار مقبول موقع پر ہی ہلاک ہو گیا، جبکہ دو دیگر زخمی اہلکاروں کو فوری طور پر قریبی اسپتال منتقل کیا گیا جہاں ان کا علاج جاری ہے۔

واقعے کے فوراً بعد پولیس اور قانون نافذ کرنے والے دیگر اداروں نے جائے وقوعہ کو گھیرے میں لے کر شواہد اکٹھے کیے، جبکہ حملہ آوروں کی تلاش کے لیے علاقے میں سرچ آپریشن بھی شروع کر دیا گیا ہے۔

پولیس کا کہنا ہے کہ واقعے کی نوعیت اور محرکات کی مکمل تحقیقات جاری ہیں، اور جلد حملہ آوروں کو گرفتار کر لیا جائے گا۔ دوسری جانب سیشن جج مسکان خان حملے میں محفوظ رہے۔