سندھ میں انتہائی مطلوب دہشت گردوں کی نئی ریڈ بک جاری

کراچی (ڈیلی اردو) پاکستان کے صوبہ سندھ میں سی ٹی ڈی نے انتہائی مطلوب دہشت گردوں کی تازہ ترین ریڈ بک جاری کر دی ہے۔

کاؤنٹر ٹیررازم ڈیپارٹمنٹ (سی ٹی ڈی) سندھ نے انتہائی مطلوب دہشت گردوں کی فہرست پر مبنی ’ریڈ بک‘ کا دسواں ایڈیشن جاری کر دیا ہے۔

تفصیلات کے مطابق 203 صفحات پر مشتمل اس ریڈ بک میں دہشت گردوں سے متعلق اہم معلومات شامل کی گئی ہیں، جن میں وہ افراد بھی شامل ہیں جن کے سروں کی قیمت مقرر کی جا چکی ہے۔

سی ٹی ڈی حکام کے مطابق نئی ریڈ بک میں مختلف کالعدم تنظیموں سے تعلق رکھنے والے انتہائی مطلوب دہشت گردوں کی تازہ ترین تفصیلات شامل کی گئی ہیں۔ اس دستاویز میں کالعدم داعش، کالعدم القاعدہ، کالعدم تحریک طالبان پاکستان (ٹی ٹی پی) اور دیگر کالعدم بلوچ عسکریت پسند تنظیموں سے وابستہ مطلوب افراد کا ریکارڈ اپ ڈیٹ کیا گیا ہے۔

ریڈ بک میں مطلوب افراد کی تصاویر، کوائف اور ان کے نیٹ ورکس سے متعلق اہم معلومات بھی درج کی گئی ہیں۔

سی ٹی ڈی حکام کے مطابق یہ ریڈ بک قانون نافذ کرنے والے اداروں کی کارروائیوں میں معاونت کے لیے ایک اہم دستاویز ہے، جبکہ اس کا مقصد مختلف سکیورٹی اداروں کے درمیان معلومات کے تبادلے کو مؤثر بنانا اور مطلوب دہشت گردوں کی نقل و حرکت پر نظر رکھنا ہے۔

سی ٹی ڈی کا کہنا ہے کہ ریڈ بک کا نیا ایڈیشن صوبے میں انسداد دہشت گردی کی جاری کارروائیوں کو مزید مؤثر بنانے میں مددگار ثابت ہوگا۔