سوات، شمالی وزیرستان اور کوہاٹ میں دہشت گرد حملے، پولیس اہلکار سمیت 6 اہلکار ہلاک

پشاور (نمائندگان ڈیلی اردو) خیبر پختونخوا کے تین اضلاع میں دہشت گردوں کے خلاف کارروائیوں کے دوران فائرنگ کے تبادلے میں ایک پولیس اہلکار اور ویلج ڈیفنس کمیٹی (وی ڈی سی) کے چار ارکان سمیت 6 افراد ہلاک ہو گئے، جبکہ سیکیورٹی اداروں نے 6 دہشت گردوں کو بھی ہلاک کرنے کا دعویٰ کیا ہے۔

ڈیلی اردو کے مطابق سوات کے بالائی علاقوں میں کالعدم تحریک طالبان پاکستان (ٹی ٹی پی) سے تعلق رکھنے والے دہشت گردوں کے خلاف محکمہ انسداد دہشت گردی (سی ٹی ڈی) اور خیبر پختونخوا پولیس کا مشترکہ سرچ اینڈ اسٹرائیک آپریشن مکمل کر لیا گیا۔

سیکیورٹی ذرائع کے مطابق آپریشن کے دوران دہشت گردوں کے ساتھ شدید فائرنگ کا تبادلہ ہوا، جس میں ایک پولیس اہلکار اور ویلج ڈیفنس کمیٹی کے چار ارکان ہلاک ہو گئے، جبکہ 6 دہشت گرد بھی مارے گئے۔

پولیس ذرائع کے مطابق کارروائی کے دوران متعدد دہشت گرد زخمی بھی ہوئے، جنہیں ان کے ساتھی اپنے ساتھ لے جانے میں کامیاب ہو گئے۔

سیکیورٹی اداروں نے علاقے میں سرچ آپریشن کے دوران دہشت گردوں کے ٹھکانوں کو نشانہ بنایا اور مختلف مقامات پر کارروائیاں کیں۔

ذرائع کے مطابق ہلاک ہونے والے وی ڈی سی ارکان میں عمر حیات ولد محمد شیر، گل زیب ولد عقل مند، محمد کریم ولد سیدا جان اور اختر زیب شامل ہیں، جن کا تعلق سوات کے مختلف علاقوں سے بتایا جاتا ہے۔

محمد کریم اس سے قبل ویلج ڈیفنس کمیٹی کے رکن رہ چکے تھے اور علاقے میں امن و امان کے قیام کے لیے خدمات انجام دیتے رہے تھے۔ جھڑپ میں پولیس اہلکار گلفام بنگش بھی ہلاک ہوئے۔

تمام ہلاک افراد کی لاشیں مقامی اسپتال منتقل کر دی گئیں، جہاں ضروری کارروائی کے بعد انہیں آبائی علاقوں میں منتقل کیا جائے گا۔

دوسری جانب شمالی وزیرستان میں ایک مسجد پر کواڈ کاپٹر حملے میں ایک شہری ہلاک ہو گیا، جبکہ کوہاٹ میں مسجد کے اندر دھماکے سے مسجد کے دو کمرے منہدم ہو گئے، تاہم حکام کے مطابق واقعے میں کوئی جانی نقصان نہیں ہوا۔

سیکیورٹی اداروں کا کہنا ہے کہ خیبر پختونخوا میں دہشت گردوں کے خلاف کارروائیاں جاری رہیں گی۔