سی ٹی ڈی کراچی میں کارروائی، فرقہ وارانہ کارروائیوں میں ملوث گینگ کے اہم رکن سمیت 5 ملزمان گرفتار

کراچی (مانیٹرنگ ڈیسک) کاؤنٹر ٹیررازم ڈیپارٹمنٹ (سی ٹی ڈی) سندھ نے کراچی کے علاقے کورنگی میں کارروائی کرتے ہوئے فرقہ وارانہ ٹارگٹ کلنگ میں اسلحہ فراہم کرنے والے گینگ کے رکن سمیت 5 ملزمان کو گرفتار کر لیا۔

سی ٹی ڈی کے مطابق برمی 302 گینگ ملائیشیا سے آپریٹ ہوتا تھا، گینگ ملک میں فرقہ وارانہ ٹارگٹ کلنگ کی کارروائیوں کیلئے اسلحہ فراہم کرنے میں ملوث ہے، کارروائی کے دوران برمی گینگ کے اہم کارندے فیصل عرف کوڈو عرف کوفتہ، جنید، محسن اور شاہ فہد کو حراست میں لیا گیا ہے۔

حکام نے بتایا ہے کہ ملزمان پشاور اور نوشہرہ سے اسلحے کی بڑے پیمانے پر سپلائی کرتے تھے اور ان کا برمی 302 نامی گینگ جرائم کی متعدد سنگین وارداتوں میں ملوث ہے، ملائیشیا میں بیٹھا شان نامی شخص گینگ کو آپریٹ کرتا تھا، ملزمان کے قبضے سےغیر قانونی اسلحہ برآمد کر کے مزید تفتیش شروع کر دی گئی ہے۔

سی ٹی ڈی حکام کے مطابق فیصل نے اپنے لیڈر راشان کی ہدایت پر صفدر رضوی کے قاتلوں کو بھی اسلحہ فراہم کیا تھا، گرفتار ملزم محسن 5 ہزار روپے میں اسلحے کی ڈیلیوری کرتا تھا۔