شام میں امریکی فضائی حملہ، داعش کا سینئر رہنما ہلاک

واشنگٹن (نمائندہ ڈیلی اردو)  امریکی فوج نے شام کے شمال مغربی علاقے میں فضائی حملہ کر کے شدت پسند تنظیم داعش کے ایک سینئر رہنما کو ہلاک کرنے کا اعلان کیا ہے۔ امریکی سینٹرل کمانڈ (سینٹ کام) کے مطابق یہ کارروائی گزشتہ جمعہ کو کی گئی، جس میں داعش کے اہم رہنما علی حسین العلوی مارا گیا۔

سینٹ کام نے بدھ کے روز سوشل میڈیا پلیٹ فارم ایکس پر جاری بیان میں کہا کہ یہ حملہ امریکا کی ان مسلسل انسداد دہشت گردی کارروائیوں کا حصہ ہے جن کا مقصد ایسے دہشت گردوں کو ناکام بنانا اور ختم کرنا ہے جو امریکا یا بیرونِ ملک امریکی شہریوں اور مفادات پر حملوں کی منصوبہ بندی کر رہے ہیں۔

بیان میں کہا گیا کہ امریکی افواج داعش کی قیادت اور اس کے آپریشنل نیٹ ورک کو نشانہ بنانے کا سلسلہ جاری رکھیں گی تاکہ تنظیم دوبارہ منظم نہ ہو سکے۔

دوسری جانب داعش نے حالیہ مہینوں میں شام میں اپنی سرگرمیوں میں اضافے کا اعلان کیا ہے۔ تنظیم نے صدر احمد الشرع کی حکومت کے خلاف کارروائیوں کے ایک نئے مرحلے کا اعلان کرتے ہوئے فروری سے اب تک متعدد حملوں کی ذمہ داری قبول کی ہے۔

گزشتہ ہفتے داعش نے شمال مشرقی صوبہ حلب کے شہر منبج کے قریب ہونے والے ایک حملے کی ذمہ داری بھی قبول کی تھی، جس سے ظاہر ہوتا ہے کہ تنظیم مختلف علاقوں میں اپنی موجودگی برقرار رکھنے کی کوشش کر رہی ہے۔

واضح رہے کہ شام میں خانہ جنگی کے دوران ایک دہائی قبل داعش اپنے عروج پر ملک کے تقریباً ایک چوتھائی حصے پر قابض تھی، تاہم بعد ازاں امریکا کی قیادت میں قائم بین الاقوامی اتحاد اور دیگر مقامی و علاقائی فورسز کی کارروائیوں کے نتیجے میں اسے ان علاقوں سے بے دخل کر دیا گیا۔

اگرچہ داعش اپنی بیشتر علاقائی عملداری کھو چکی ہے، تاہم تنظیم اب بھی شام کے مختلف حصوں میں وقفے وقفے سے حملے کرتی رہتی ہے، جس کے باعث خطے میں سکیورٹی خدشات بدستور برقرار ہیں۔