شام میں امریکی ڈرون حملہ، داعش کا سربراہ ہلاک

دمشق (ڈیلی اردو) امریکی محکمہ دفاع پینٹاگون کے مطابق شام میں ڈرون حملے میں داعش کا ایک لیڈر ہلاک ہوگیا ہے۔

امریکی فوج نے یہ ڈرون حملہ شام کے مغربی حصے میں روسی فوجی طیاروں کی جانب سے ایم کیو نائن ریپر ڈرونز کو ہراساں کیے جانے کے چند گھنٹے کے بعد کیا ہے۔

U.S. airstrike targets ISIS leader in eastern Syriahttps://t.co/RtzKlBhXKE pic.twitter.com/A6IFnUGlXB

— U.S. Central Command (@CENTCOM) July 9, 2023

امریکا کے ایک دفاعی عہدہدار نے بتایا کہ جمعہ کو تین ریپر ڈرونز عسکریت پسندوں کی تلاش میں پرواز کر رہے تھے جب انھیں روسی طیاروں نے قریباً دو گھنٹے تک ہراساں کیا۔

اس عہدہ دار نے نام ظاہر نہ کرنے کی شرط پر بتایا کہ اس کے کچھ ہی دیر بعد حلب کے علاقے میں امریکی ڈرون نے موٹرسائیکل پر سوار اسامہ المہاجر کو میزائل حملے میں نشانہ بنایا اورہلاک کردیا۔

حکام کا کہنا تھا کہ حملے کے وقت اسامہ المہاجر شمال مغربی شام میں تھے لیکن وہ عام طور پر جنگ زدہ ملک کے مشرقی علاقے میں ہوتے تھے،فوری طور پر یہ واضح نہیں ہوا کہ امریکی فوج نے اسامہ المہاجر کی شناخت اور ہلاکت کی کیسے تصدیق کی ہے۔

اتوار کے روز ایک بیان میں امریکا کی مرکزی کمان نے کہا کہ اس بات کے کوئی اشارے نہیں ملے ہیں کہ اس حملے میں کوئی عام شہری ہلاک ہوا ہے۔تاہم فوج ان اطلاعات کا جائزہ لے رہی ہے کہ ایک شہری زخمی ہوا ہے۔

امریکا کی سنٹرل کمانڈ کے کمانڈر جنرل ایرک کوریلا نے ایک بیان میں کہا کہ ہم نے یہ واضح کر دیا ہے کہ ہم پورے خطے میں داعش کو شکست دینے کے لیے پرعزم ہیں۔