شام میں داعش کے خلاف امریکی فضائی حملے، متعدد عسکریت پسند ہلاک

واشنگٹن (ڈیلی اردو) شام میں دہشت گرد تنظیم ’اسلامک اسٹیٹ‘ (داعش) کے خلاف امریکہ کے فضائی حملوں میں ہفتہ 20 دسمبر کی علی الصبح کم از کم پانچ عسکریت پسند ہلاک ہو گئے، جن میں داعش کے ایک سیل کا رہنما بھی شامل ہے۔

یہ حملے جمعے اور ہفتے کی درمیانی شب کیے گئے، جبکہ امریکی فوج کے مطابق شام میں 70 سے زائد داعش اہداف کو نشانہ بنایا گیا۔ امریکی صدر ڈونلڈ ٹرمپ نے ان کارروائیوں کو 13 دسمبر کو کیے گئے خونریز حملے کے بعد ’’انتہائی سنجیدہ جوابی کارروائی‘‘ قرار دیا ہے۔

سیریئن آبزرویٹری فار ہیومن رائٹس کے سربراہ رامی عبدالرحمان نے تصدیق کی کہ دیر الزور میں کم از کم پانچ جہادی مارے گئے، جن میں وہ سیل کا سربراہ بھی شامل تھا جو اس خطے میں داعش کے ڈرون حملوں کا ذمہ دار تھا۔

ایک ہفتہ قبل، پالمیرا میں داعش کے حملے میں دو امریکی فوجی اور ایک امریکی شہری ہلاک ہوئے تھے۔ امریکی فضائی حملے حمص، دیر الزور اور رقعہ سمیت کئی شامی صوبوں میں کیے گئے۔