شمالی وزیرستان میں خودکش حملہ، چار پاکستانی فوجی ہلاک، 15 شہری زخمی

راولپنڈی (ڈیلی اردو) پاکستان کے شورش زدہ صوبے خیبرپختونخوا کے قبائلی ضلع شمالی وزیرستان میں جمعے کو شدت پسندوں نے سکیورٹی فورسز کے کیمپ پر خودکش حملہ کیا، جس میں چار فوجی اہلکار ہلاک اور 15 شہری زخمی ہوئے، جن میں خواتین اور بچے بھی شامل ہیں۔

پاکستانی فوج کے شعبہ تعلقات عامہ (آئی ایس پی آر) کے مطابق یہ حملہ تحریک طالبان پاکستان (ٹی ٹی پی) کے شدت پسندوں نے کیا، جنہوں نے بارود سے لدی گاڑی کیمپ کی بیرونی دیوار سے ٹکرائی۔ 

اس دھماکے سے کیمپ کے ساتھ واقع مسجد اور دیگر شہری انفراسٹرکچر کو بھی نقصان پہنچا۔

آئی ایس پی آر کے مطابق سیکیورٹی فورسز کی جوابی کارروائی میں چار شدت پسند ہلاک ہوئے، جبکہ فائرنگ کے تبادلے میں چار فوجی اہلکار بھی مارے گئے۔

شعبہ تعلقات عامہ نے مزید کہا کہ اس حملے کی منصوبہ بندی افغانستان میں موجود شدت پسندوں نے کی، جس سے وہاں موجود طالبان حکومت کے دعوے کی نفی ہوتی ہے کہ ان کی سرزمین پر دہشت گرد گروہوں کی کوئی موجودگی نہیں۔ 

آئی ایس پی آر کا کہنا ہے کہ پاکستان افغان عبوری حکومت سے توقع رکھتا ہے کہ وہ اپنی ذمہ داریاں پوری کرے۔