شمالی وزیرستان میں سیکیورٹی فورسز کا آپریشن، کمانڈر سمیت درجن سے شدت پسند ہلاک

میران شاہ (د م و) صوبہ خیبر پختونخوا کے قبائلی ضلع شمالی وزیرستان کے علاقے دتہ خیل میں سیکیورٹی فورسز نے خفیہ اطلاع پر مبنی ایک کارروائی میں کالعدم تحریک طالبان پاکستان (ٹی ٹی پی) کے دھڑے حافظ گل بہادر گروپ کے 18 جنگجوؤں کو ہلاک کر دیا۔

سیکیورٹی ذرائع کے مطابق یہ آپریشن مصدقہ انٹیلی جنس اطلاعات کی بنیاد پر کیا گیا۔ فورسز نے مخصوص خفیہ ٹھکانے کو ہدف بنایا، جو حملے میں مکمل طور پر تباہ ہو گیا۔ کارروائی کے دوران تمام شدت پسند مارے گئے، جن میں گروپ کے اہم کمانڈر بھی شامل تھے۔

ذرائع کے مطابق ہلاک ہونے والے جنگجو سیکیورٹی اہلکاروں اور عام شہریوں پر متعدد مہلک حملوں میں ملوث تھے، اور ان کی ہلاکت کو گروپ کی عسکری صلاحیتوں کے لیے ایک بڑا دھچکہ قرار دیا جا رہا ہے۔

کارروائی کے بعد علاقے میں کلیئرنس آپریشن جاری ہے تاکہ ممکنہ طور پر موجود دیگر خطرات کا خاتمہ کیا جا سکے۔

تاحال پاکستانی فوج کے شعبۂ تعلقاتِ عامہ (آئی ایس پی آر) کی جانب سے واقعے پر کوئی باضابطہ بیان جاری نہیں کیا گیا۔