عراق: الحشد الشعبی کو حملوں کا جواب دینے کی اجازت

بغداد (ڈیلی اردو) عراقی سرکاری خبر رساں ادارے (ائی این اے) نے منگل کے روز اعلیٰ حکام کے حوالے سے بتایا کہ عراق کی قومی سلامتی کی وزارتی کونسل نے الحشد الشعبی اور دیگر سکیورٹی اداروں کو یہ اختیار دے دیا ہے کہ وہ حملوں کی صورت میں جواب دینے اور اپنا دفاع کرنے کے حق کو استعمال کر سکیں۔

سرکاری ذرائع کے مطابق، وزارتی کونسل نے الحشد الشعبی اور دیگر سکیورٹی اداروں کو اجازت دی ہے کہ وہ اپنی تنصیبات کو نشانہ بنانے والے فوجی حملوں کے خلاف جوابی کارروائی کر سکیں اور دفاع کریں۔

مزید کہا گیا کہ وزارتی کونسل نے ان افراد کے خلاف گرفتاری کے وارنٹ نافذ کرنے کا فیصلہ بھی کیا ہے جو سکیورٹی اداروں، شہری مفادات اور سفارتی مشنز کو نشانہ بنانے میں ملوث ہیں، اور ہدایت کی گئی ہے کہ ان گروہوں کی شناخت ظاہر کی جائے جن سے یہ افراد تعلق رکھتے ہیں۔