عراق: کرکوک میں داعش کے ٹھکانوں پر فضائی حملے، 8 ٹھکانے تباہ

بغداد (ڈیلی اردو) عراق کے صوبہ کرکوک میں سیکیورٹی فورسز نے انٹیلی جنس معلومات کی بنیاد پر فضائی کارروائی کرتے ہوئے داعش کے 8 ٹھکانے تباہ کردیئے۔

عراقی سیکیورٹی میڈیا سیل کے مطابق کارروائی کرکوک آپریشنز کمانڈ کے تحت گیارہویں ڈویژن کے ذمہ داری والے علاقے میں کی گئی۔ کارروائی کے لیے فوجی انٹیلی جنس سے ملنے والی مصدقہ معلومات کو بنیاد بنایا گیا، جن میں علاقے میں داعش کے جنگجوؤں کی موجودگی کی نشاندہی کی گئی تھی۔

بیان کے مطابق فضائیہ کے تعاون اور مسلح افواج کے کمانڈر انچیف کے دفتر میں قائم ہدف بندی سیل کی براہ راست نگرانی میں کارروائی سے قبل علاقے کی فضائی نگرانی کی گئی، جس کے بعد سزنا کاروان طیاروں کے ذریعے داعش کے مشتبہ ٹھکانوں کو نشانہ بنایا گیا۔

سیکیورٹی میڈیا سیل کے مطابق فضائی حملوں میں داعش کے 8 ٹھکانے مکمل طور پر تباہ ہوگئے، جبکہ کارروائی سے متعلق مزید تفصیلات بعد میں جاری کی جائیں گی۔