غزہ میں اسرائیلی حملوں میں 9 فلسطینی ہلاک، متعدد زخمی

غزہ (ڈیلی اردو/وفا) غزہ پٹی کے شمالی اور جنوبی علاقوں میں اسرائیلی حملوں کے نتیجے میں کم از کم نو فلسطینی ہلاک اور متعدد دیگر زخمی ہو گئے۔ 

فلسطینی خبر رساں ایجنسی وفا کے مطابق حملے اتوار کی صبح ہوئے، جن میں رہائشی علاقوں اور کھلے میدانوں کو نشانہ بنایا گیا۔

اسرائیلی فوج کا دعویٰ ہے کہ اس کے حملے ’’حماس کے اہداف‘‘ پر کیے گئے اور یہ کارروائیاں اس وقت کی گئیں جب حماس نے چار ماہ سے جاری جنگ بندی معاہدے کی خلاف ورزی کی۔ 

فوجی ترجمان کے مطابق اسرائیلی نگرانی  کے دوران غزہ  کے شمال میں ’’ییلو لائن‘‘ کے قریب ’’متعدد مسلح افراد‘‘ کی موجودگی کا پتا چلا۔

’’ییلو لائن‘‘ وہ حد ہے جہاں جنگ بندی کے بعد اسرائیلی فوج نے اپنی واپسی روک دی تھی۔

فوج کا کہنا ہے کہ مشتبہ افراد ’’زیرِ زمین سرنگ سے نکل کر ملبے میں چھپے ہوئے تھے‘‘ اور اسرائیلی دستوں کے قریب پہنچ گئے تھے۔ فوج نے بتایا کہ کم از کم دو حملہ آور مارے گئے جبکہ مزید کی موجودگی کا شبہ ہے۔

اسرائیلی فوج نے علاقے میں مزید ’’دہشت گرد عناصر‘‘ کی تلاش کے لیے سرچ آپریشن بھی کیا۔ 

10 اکتوبر کو جنگ بندی کے آغاز کے بعد غزہ میں متعدد مرتبہ پرتشدد واقعات سامنے آ چکے ہیں جن میں سینکڑوں شہری ہلاک یا زخمی ہو چکے ہیں۔

مختلف رپورٹوں کے مطابق اسرائیل اس وقت غزہ پٹی کے نصف سے زائد علاقے پر عملی کنٹرول رکھتا ہے، جہاں تقریباً 20 لاکھ فلسطینی آباد ہیں۔

غزہ پٹی 41 کلومیٹر طویل اور 6 سے 12 کلومیٹر چوڑی ساحلی پٹی  پر مشتمل ہے، جو مسلسل تنازع اور انسانی بحران کا مرکز بنی ہوئی ہے۔