قطر نے ایرانی پائلٹوں کی گرفتاری کے دعوے کو مسترد کردیا

دوحہ/تہران (ڈیلی اردو) قطر نے ایران کے اس دعوے کی تردید کردی ہے کہ مارچ میں لاپتا ہونے والے تین ایرانی جنگی پائلٹ قطری حکام کی حراست میں ہیں۔ قطری وزارت خارجہ نے ایرانی مؤقف کو گمراہ کن قرار دیتے ہوئے واقعے سے متعلق اپنا مؤقف پیش کردیا۔

قطری وزارت خارجہ کے ترجمان ماجد الانصاری نے کہا ہے کہ مارچ میں ایرانی طیاروں کی جانب سے قطری فضائی حدود کی خلاف ورزی کے بعد متعلقہ پائلٹوں سے رابطہ کرنے کی کوشش کی گئی تھی۔ ان کے مطابق جب پائلٹوں کی جانب سے کوئی جواب موصول نہیں ہوا تو قطر نے بین الاقوامی قوانین اور مسلح تنازعات سے متعلق ضوابط کے تحت اپنے دفاع میں کارروائی کی۔

ماجد الانصاری کے مطابق کارروائی کے بعد قطری تلاش اور امدادی ٹیموں نے متاثرہ پائلٹوں کی تلاش شروع کی۔ ان کا کہنا ہے کہ ایک پائلٹ کی لاش ملی، جس کی باقیات ایران منتقل کرنے کے لیے قطری حکومت نے تہران سے رابطہ کیا تھا۔

قطری ترجمان نے ایرانی دعوے پر حیرت کا اظہار کرتے ہوئے کہا کہ خطے میں کشیدگی کم کرنے اور سفارتی کوششوں کے دوران ایسے بیانات صورتحال کو مزید پیچیدہ کرسکتے ہیں۔

دوسری جانب ایران کا مؤقف اس کے برعکس ہے۔ ایرانی مسلح افواج کے جنرل اسٹاف میں لاپتا افراد کی تلاش سے متعلق کمیٹی کے سربراہ بریگیڈیئر جنرل محمد باقر زادہ نے دعویٰ کیا ہے کہ تین ایرانی پائلٹ قطری فورسز کی تحویل میں ہیں۔

ایرانی میڈیا کے مطابق باقر زادہ نے عالمی ریڈ کراس کمیٹی کی صدر ماریانا سپولیئرک کو خط لکھ کر تینوں پائلٹوں کی صورتحال واضح کرنے میں مدد کی درخواست کی ہے۔ ایرانی حکام کے مطابق 2 مارچ 2026 کو دو ایس یو-24 جنگی طیارے ایک فوجی مشن پر روانہ ہوئے تھے، تاہم واپسی کے دوران انہیں نشانہ بنایا گیا۔

ایران کا کہنا ہے کہ اس واقعے میں چار پائلٹ متاثر ہوئے، جن میں سے ماجد کاظمی کی لاش ایران منتقل کردی گئی، جبکہ جواد صالحی، عبدالمجید دشتیان اور عمران بہروشیان کے بارے میں تہران کا دعویٰ ہے کہ انہیں زندہ گرفتار کیا گیا تھا۔

ایرانی حکام اس سے قبل بھی تینوں پائلٹوں کے بارے میں معلومات حاصل کرنے کی کوششوں کا ذکر کرچکے ہیں، تاہم ان کی موجودہ حیثیت سے متعلق کوئی حتمی معلومات سامنے نہیں آسکیں۔

یوں ایرانی اور قطری مؤقف میں واضح تضاد پایا جاتا ہے، جبکہ تینوں پائلٹوں کی موجودہ صورتحال سے متعلق آزادانہ طور پر حتمی تصدیق سامنے نہیں آئی۔