لاہور: رائیونڈ روڈ پر تبلیغی جماعت کی بس پر فائرنگ، ایک تبلیغی زخمی

لاہور (ڈیلی اردو) صوبہ پنجاب کے صوبائی حکومت لاہور کے علاقے رائیونڈ روڈ پر نامعلوم کار سواروں نے اوور ٹیک کرنے پر تبلیغی جماعت کی بس پر فائرنگ کردی جس کے نتیجے میں ایک تبلیغی زخمی ہوگیا۔

لاہور پولیس کے مطابق جمعہ اور ہفتے کی درمیانی شب رائیونڈ روڈ پر بس نے ایک کار کو اوور ٹیک کیا تو ملزمان غصے میں آگئے اور چلتی گاڑی سے فائرنگ کردی۔

پولیس کا کہنا ہےکہ نامعلوم کار سواروں نے بس پر تین فائر کیے جس کے نتیجے میں گولی لگنے سے ایک شخص زخمی ہوگیا جسے ہسپتال منتقل کر دیا گیا اور اس کی حالت تسلی بخش ہے۔

واقعہ کے بعد مسافروں نے شدید احتجاج کیا اور سڑک کو عارضی طور پر بند کرنا پڑا جس سے ٹریفک کو دشواری کاسامنا رہا، پولیس کی بھاری نفری موقع پر پہنچی، ڈی آئی جی آپریشنز ساجد کیانی کا کہنا تھا کہ فائرنگ کے واقعات ہرگز قابلِ برداشت نہیں، تبلیغی جماعت کی بس پر فائرنگ کے معاملے پر ڈی آئی جی آپریشنز ساجد کیانی نے ایس پی صدر حفیظ الرحمن کو ملزمان کی گرفتاری کا حکم دے دیا جبکہ واقعہ میں زخمی شحض کو بہترین طبی امداد فراہم کرنے کی ہدایت کی گئی جب کہ بس کے مالک نے واقعے کا مقدمہ بھی درج کرا دیا ہے۔